Dostyq úıiniń qyzmetkerleri jyl basynda elimizde turyp jatqan shyǵys mádenıeti ókilderiniń ulttyq ónerin nasıhattaıtyn aýqymdy shara ótkizýdi josparlap qoıǵan. Alaıda kóktemde pandemııa bastalyp, kedergi kóbeıdi. Karantın rejimi qaıta kúsheıgen soń, uıymdastyrýshylar festıvaldi onlaın baılanys kómegimen ótkizýdi jón kóripti.
– Kópshiliktiń qatysýymen ótetin sharalarǵa tyıym salynǵan soń, uıymdastyrýshylar da, shaqyrtý alǵan qonaqtar da festıvalden kúder úze bastaǵan. Biraq oıǵa alǵan dúnıeni ne de bolsa óz ýaqytynda ótkizeıik degen nıetpen, bıyl alǵash uıymdastyrylyp jatqan sharany onlaın rejimde ótkizýdi uıǵardyq, – deıdi Dostyq úıindegi qoǵamdyq-buqaralyq sharalardy uıymdastyrý bóliminiń jetekshisi Iýlııa Ponomareva.
Osylaısha, elimizdiń barlyq aımaqtaryna shaqyrtý jiberilgen. Sharaǵa on shaqty óner ujymy qatysty. Onlaın festıvalde Irannyń «Bahram» bıin myń buraltqan aqtaýlyq «Ekzotıka» bı tobynyń óneri kórermendi birden baýrap aldy. О́zbektiń «Horezm» bıin oryndaǵan oraldyq ónerpazdar da kópshilik kóńilinen shyqty. Dál osy bıdi Qostanaıdaǵy «Altynaı» halyqtyq úlgidegi bı ansambli de sátti oryndap shyqty. Mádenı shara aıasynda kópshilikke «Qazaqstan uıǵyrlarynyń respýblıkalyq mádenı ortalyǵy» qoǵamdyq qorynyń Pavlodardaǵy fılıalynyń atynan shyqqan «Evrıshım» bı ansambliniń ártisteri uıǵyr halqynyń «Gýldak jananla» bıin, tarazdyq «Infınıtı» horeografııalyq ujymy ózbek bıin tartý etti.
Qostanaılyq ánshiler shyǵys ánderin naqyshyna keltire oryndap, bı kerýeniniń sán-saltanatyn asyra tústi. Kórermender ásirese ózbek ánin tamyljyta shyrqaǵan «Sharq» tájik-ózbek birlestiginiń belsendisi Anvar Ospanov pen «Ásem-Bend» vokaldyq tobynyń ánshisi Kámıla Júnisovanyń dýetin erekshe ystyq yqylaspen qabyldady.
Onlaın festıvaldiń tolyq nusqasyn oblystyq assambleıanyń You Tube-arnasynan tamashalaýǵa bolady.
Qostanaı oblysy
