Bıznes ashýǵa baılanysty tıimdi memlekettik baǵdarlamalardyń iske qosylýy, nesıeleýdiń paıyzdyq mólsherlemesiniń azaıtylýy, shaǵyn jáne orta bıznes nysanyn tirkeý kezindegi qujattardyń azaıtylyp, tirkeý merziminiń ońaılatylýy kóptegen turǵyndardy óz isterin bastaýǵa yntalandyrdy.
Oblystyq kásipkerlik basqarmasynyń basshysy Nurhan Tileýmuratovtyń aıtýynsha, qazir óńirde 60 myńǵa jýyq shaǵyn jáne orta kásipkerlik nysandary jumys istep jatyr. Salystyra aıtqanda, bıyl óńirdegi shaǵyn kásipkerlerdiń úlesi ótken jylmen salystyrǵanda 2,7 paıyzǵa artqan. Kópshilik azamattar «Bıznestiń jol kartasy», «Qarapaıym zattar ekonomıkasy» jáne «Eńbek» baǵdarlamalary boıynsha az paıyzben uzaq merzimge nesıeler rásimdep, birden jumys bastap ketti. Kóbinese az qamtylǵan otbasylar, kópbalaly analar, jumyssyz júrgen azamattar oqý kýrstarynan ótip, jeke kásipker retinde tirkelip, az paıyzdyq mólsherlememen nesıeler alyp, óz kásipterin ashyp úlgerdi. Turǵyndar qujattaryn rásimdeýge nesıe berýshi uıymdardyń qyzmetkerleri, halyqqa qyzmet kórsetý ortalyqtarynyń mamandary jaqsy atsalysyp, der kezinde jáne sapaly jumys atqardy. Sonyń arqasynda kásipti tirkeýge jáne nesıe alýǵa qujattardy rásimdeý merzimderi qysqardy.
Aqtóbe oblysynda byltyr «Bıznestiń jol kartasy» baǵdarlamasy boıynsha kásipkerlerge 2,4 mlrd teńge bólinse, bıyl osy qarastyrylǵan qarjy kólemi 3,3 mlrd teńgege artqan. Ústimizdegi jyly osy baǵdarlama boıynsha 492 ótinim maquldanyp, byltyrǵy jylmen salystyrǵanda jańa jobalar sany 59 paıyzǵa joǵarylady. «Bıznestiń jol kartasy» baǵdarlamasynyń ereksheligi – jańadan kásip bastaǵan bir azamat 5-6 paıyzdyq jyldyq mólsherlememen 20 mln teńgege deıin nesıe ala alady.
Qalada da, dalada da kásip ashýǵa múmkindik beretin, naryqqa qajetti ónim óndirýshilerdi qoldaıtyn «Qarapaıym zattar ekonomıkasy» boıynsha byltyr 83 joba, bıyl 110 joba qoldaý alǵan. «Eńbek» baǵdarlamasy arqyly 960 joba maquldanyp, jyl ishinde turǵyndarǵa 4 mlrd teńgeden astam nesıe berilgen. «Eńbek» baǵdarlamasy eldi mekenderde turyp, mal sharýashylyǵymen aınalysqysy keletinder úshin taptyrmas joba. Osy jobamen qarjy alyp, shashtaraz, naýbaıhana, kıim tigetin atele ashyp, mal-qus ósirip, jylyjaı salyp kókónis ósiretin qyz-kelinshekter, kópbalaly analar kóbeıgen.
«Kásipkerler palatasy kóktemde pandemııa bastalǵannan bastap, jedel telefon jáne áleýmettik jelidegi paraqshalary arqyly kásipkerlerdiń barlyq saýaldaryna jaýap berýge tyrysty. Naýryz aıynan bastap jumystaryn toqtatqan kásipkerler nesıe tóleý merzimine jeńildik surady, salyqtyń azaıtylýy men pandemııadan keıingi bıznestiń ahýalyn surady», deıdi «Atameken» Ulttyq kásipkerler palatasynyń Aqtóbe oblystyq fılıalynyń sarapshysy Rahat Tájibaev.
Ulttyq ekonomıka mınıstrliginiń saraptaýymen elimizde eń kóp zardap shekken 29 kásipkerlik túri boıynsha salyq jeńildikteriniń berilýi, nesıe qaryzdary bar kásipkerlerdiń 1 qarashaǵa deıin ony tóleý merzimderiniń uzartylýy, memleket menshiginen ne kvazısektorlyq menshikten jalǵa alyp otyrǵan kásipkerlerge jaldaý aqysynan úsh aıǵa bosatylýy – pandemııa kezindegi shekteýlerge baılanysty toqtap turǵan shaǵyn jáne orta kásipkerlik nysandaryna jaqsy qoldaý boldy.
AQTО́BE
