Vedomstvo basshysy jańa júıeni engizýdiń basty maqsaty kópshilik úshin bilim salasyndaǵy qarjylandyrýdyń ashyqtyǵyn jáne tıimdiligin baqylaýdy qamtamasyz etý ekenin jetkizdi.
«Býhgalterııany, kadrlardy, esepke alý men bıýdjetti josparlaýdy avtomattandyrý sybaılas jemqorlyq táýekelderin aldyn alýǵa jáne qarjyny tıimdi paıdalanýdy arttyrýǵa jaǵdaı jasaıdy. Iаǵnı, mekteptiń bıýdjetine, onyń árbir jumsaǵan teńgesine qatysty aqparatqa bizdiń mınıstrlik, basqa quzyrly memlekettik organdar jáne azamattyq qoǵam ókilderi qol jetkize alady. Bul – mańyzdy bastama. Bilim berý salasyn qarjylandyrý jyldan jylǵa artyp keledi.
Árıne, onyń qanshalyqty jetkilikti nemese jetkiliksizdigi jóninde kóp aıtýǵa bolady. Alaıda sol bólingen qarajatty tıimdi paıdalaný mańyzdyraq», dedi A.Aımaǵambetov.
Mınıstr óz sózinde kópshiliktiń «mektepterdi, balabaqshalar men kolledjderdi Bilim jáne ǵylym mınıstrligi respýblıkalyq bıýdjet esebinen qarjylandyrady, sondaı-aq jalaqynyń ýaqtyly, durys eseptelýi, oqýlyqtardy satyp alý nemese bilim berý uıymdaryndaǵy jóndeý jumystaryn da mınıstrliktiń ózi tikeleı júrgizedi», dep qate oılaıtynyna toqtaldy.
«Zańǵa sáıkes bul jumys – ákimdikterdiń quzyrynda. Elimizde bilim berýdi basqarý organdarynyń sany 200-den asady, ıaǵnı qarjylandyrý da sol qalalar, aýdandar men oblystardyń bıýdjetinen ótedi. Ákimshilendirý deńgeıi ártúrli ári kóp bolǵan soń olardy qadaǵalap otyrý óte qıyn. Sol sebepti oblystyq bilim basqarmalarynyń ózi kóp jaǵdaıda jalaqyny ýaqtyly tóleýge, oqýlyqtardy satyp alýǵa nemese mektep, kolledjderdi jóndeý jumystaryna qatysty problemalardy buqaralyq aqparat quraldaryna shyqqanda nemese shaǵymdar kelip túskende bilip otyrady. Bul múldem durys emes. Ata-analar men muǵalimderge oryn alǵan problemalarǵa kim jaýap beretini, nege bulaı bolǵany emes, olqylyqtardyń oryn almaýy mańyzdy ǵoı. Sondyqtan qarjylandyrý mehanızmderin engizý jáne barlyq qarjylandyrý júıesin sıfrlandyrý boıynsha bastamany qolǵa aldyq», dedi mınıstr.
Atalǵan júıe osy ýaqytqa deıin elorda men Pavlodar oblysyndaǵy bilim berý uıymdarynda pılottyq joba retinde aprobasııadan ótipti. Nur-Sultan qalasy bilim basqarmasynyń basshysy Sholpan Qadyrova bas shahardaǵy bilim berý uıymdarynyń 2018 jyldan beri osy júıemen jumys isteıtinin aıtty.
«Eń aldymen, bul júıe bizge býhgalterler sanyn 40 paıyzǵa deıin qysqartýǵa múmkindik berdi. Sondaı-aq qarjyǵa qatysty ashyqtyq pen ádildikti qamtamasyz etedi. Sebebi aqparat qoljetimdi. Bilim berý uıymynyń basshysy qaı operasııanyń qashan jáne kim oryndaǵanyn bilip otyrady. Elordada bıýdjet qarajatynan birneshe mlrd teńge únemdelip, bilim berý uıymdarynyń qarjylyq qyzmeti retteldi. Býhgalterlik jáne salyq esebine alý barysynda buzýshylyqtar sany edáýir qysqaryp, shyǵyndar boıynsha táýekelder azaıdy. Atalǵan joba jalaqyny durys eseptemeý, qarjylyq buzýshylyqtar, josparlaý, qarjylandyrý kezindegi sýbektıvızm sııaqty problemalardy sheshýge jáne bilim berý mekemeleriniń qarjylyq jaǵdaıyna jedel monıtorıng júrgizýge jaǵdaı jasaıdy. Býhgalterııamen qosa bıýdjetti josparlaý, memlekettik satyp alý, tarıfıkasııalaý, jumysqa alý prosesteri de avtomattandyrylady», dedi Sh.Qadyrova.
Mınıstrliktiń málimdeýinshe, jańa júıege kóshý úshin jetkilikti ýaqyt berilgen, aldaǵy qańtar aıynan bastap bul joba barlyq bilim berý uıymdaryna engiziledi. Qarapaıym tilmen aıtqanda, «Bultty býhgalterııa» júıesi jemqorlyqtyń aldyn alady, muǵalimderdiń jalaqysyna jáne mekemelerge satyp alynatyn jabdyqtarǵa (mysaly, sońǵy kezderi satyp alynǵan kompıýterlerdiń qunyna) qatysty túrli daýly pikirlerge de núkte qoımaq.
