Bas sanıtardyń qaýlysy jarııalanysymen, polısııa basshylyǵy karantın rejiminiń kúsheıtilýine baılanysty engizilgen ózgerister týraly túsindirdi. Jergilikti polısııa qyzmeti basqarmasy bastyǵynyń orynbasary Vıtalıı Soıdyń aıtýynsha, oblys aýmaǵyndaǵy júrip-turý tártibiniń saqtalýyn 20 sanıtarlyq beket qadaǵalaıdy. 17 qarashadan bastap ár aýdanǵa mobıldi beketter qoıylyp, oblys ortalyǵy men Rýdnyıǵa baratyn turǵyndardyń jolǵa shyǵýyna shekteý qoıylady.
Qaýlyda sanıtarlyq beketterden ótýge ruqsat beriletin jolaýshylar tizimi kórsetilgen. Olardyń ishinde ótip bara jatqan jolaýshylar men júk kólikteri, vahtalyq jumysshylardy tasıtyn kólik quraldary, turǵylyqty mekenine qaıtyp kele jatqandar bar. Taksı jumysy túngi 22.00-den tańǵy 6.00-ge deıin shekteldi.
Karantın tártibiniń kúsheıtilgeni týraly aımaq basshysy Arhımed Muhambetov óziniń áleýmettik jelidegi jeke paraqshasy arqyly habarlap, oblys turǵyndaryna engizilgen shekteý sharalaryna túsinistikpen qarap, jalpyǵa birdeı mindettelgen talapty saqtaýdy surady.
«Shtab otyrysy barysynda Meńdiqara, Sarykól, Qarasý, Qostanaı, Jangeldın jáne Amangeldi aýdandary ákimderiniń aǵymdaǵy jaǵdaı týraly esebin tyńdadym. Sondaı-aq monıtorıngtik toptardyń jumysyn qarastyrdyq. О́kinishke qaraı, keıbir kásipkerlik sýbektileri engizilgen shekteý sharalaryna qaramastan, bas sanıtarlyq dárigerdiń qaýlysyn óreskel buzýǵa jol beredi, bul oblystaǵy epıdemııalyq jaǵdaıdyń nasharlaýyna ákep soǵady. Osyǵan baılanysty jedel shtab bir apta merzimge qosymsha shekteýler engizý týraly sheshim shyǵardy. Barlyq shara birinshi kezekte oblys halqynyń densaýlyǵy men ál-aýqatyn saqtaý úshin qabyldandy», – dep jazdy A.Muhambetov.
Qostanaı oblysy
