«Oblys ákimdigi bıyl rezıdentýrada bilim alǵan 100 shaqty mamannyń oqý aqysyn tólep berdi. Onyń óteýi retinde jas mamandar oblysymyzdyń emdeý mekemelerine kelip eńbek etýi tıis. Osylaısha, bıyl oqý bitirgenderdiń bir bóligi Rýdnyıǵa kelip otyr. Nátıjesinde, shtatymyz birden 12 mamanmen tolyqty. Onyń ishinde ekeýiniń ǵana eńbek ótili bar. Biz zárý bolyp otyrǵan akýsher-gınekolog, terapevt, nevrolog, rentgenolog sııaqty mamandar kelip qýanyp qaldyq», deıdi qalalyq aýrýhananyń bas dárigeri Talǵat Qaıkenov.
Bas dárigerdiń aıtýynsha, aldaǵy ýaqytta oblys ákiminiń grantymen oqyp jatqan kardıologtar da kenshiler qalasyna kelip, jumysqa ornalasýy tıis. Olar bes-alty aıdyń ishinde oqýyn aıaqtaıdy. Rýdnyıǵa kelgen árbir jas dárigerge birden baspana beriledi. Munyń syrtynda jumysqa kirisimen qolǵa tıetin 1 mln teńge kólemindegi kómek qarjy taǵy bar.
Rýdnyı aýrýhanasyna taıaýda ǵana jumysqa turǵan jas mamannyń biri – ÝDZ dárigeri Gúlbarshyn Babasova. Jas ta bolsa, Qaraǵandy medısınalyq ýnıversıteti men Nur-Sultandaǵy Ulttyq ǵylymı kardıohırýrgııalyq ortalyqtyń rezıdentýrasyn támamdap úlgergen. Rezıdentýrada oqyǵan dárigerler bilim men tájirıbeni qatar alyp júretindikten, oqýdy bitirgen soń eki jyl jumys ótili qosylady eken. Gúlbarshyn da – ekijyldyq tájirıbesi bar ÝDZ dárigeri. Jas maman terapevt, kardıolog, hırýrg, nevropotolog dárigerlerdiń joldamasymen kelgen naýqastardy zertteıdi.
– Naýqastardy ýltradybysty dıagnostıkadan ótkizip, sonyń negizinde qorytyndy shyǵaramyn. Dárigerler naýqastardy men shyǵarǵan qorytyndy men taldaý nátıjelerine súıene otyryp emdeıdi, – dedi Gúlbarshyn.
Jumysqa jańa kelgen jas mamannyń biri Indıra Úsenbek te – Qaraǵandy medısına ýnıversıtetiniń túlegi. Qaraǵandyda oqýyn támamdaǵan soń Almatyǵa baryp, Qazaqstan-Reseı medýnıversıtetiniń ınternatýrasy men Asfendııarov atyndaǵy medısına ýnıversıtetiniń rezıdentýrasynda bilimin jetildirip, tájirıbe jınaqtady. Qazir Rýdnyı aýrýhanasynyń neonatolog-reanımotology shala týǵan sábılerge dárigerlik kómek kórsetedi.
– Basty mindetim – shala týǵan sábılerge alǵashqy dárigerlik kómek kórsetý. Salmaǵy 500 gramnan asyp týǵan shaqalaqtarǵa dárigerlik kútim qajet. Mundaı sábılerdi biraz ýaqyt baqylaýda ustap, qajetti medısınalyq kómek kórsetemiz, – dedi jas maman.
Indıra ınternatýrada oqı júrip, ońaltý ortalyǵynda pedıator bolyp jumys istedi. Munda júıke júıesiniń damýy tejelgen, sal bolyp týǵan, aýtızmmen aýyratyn balalar emdeledi. Ata-analardyń kóbi balalarynyń týabitti dertke ushyraǵanyn aıtyp, jas dárigerge muń shaǵatyn.
– Osydan keıin eger men neonatolog-reanımotolog mamandyǵyn tańdaıtyn bolsam, kóptegen sábıdiń jaryq dúnıege aman-saý kelip, tórt múshesi túgel, deni saý adam bolyp ósýine, azamat bolyp qalyptasýyna septigimdi tıgizýim múmkin degen oı keldi. О́z mamandyǵymdy osylaı tańdadym. Bul jaǵdaıda kóp nárse dáriger men perınataldyq ortalyqtyń qajetti medısınalyq qurylǵylarmen jetkilikti deńgeıde qamtylýyna baılanysty. Bizdiń aýrýhanada ókpege jasandy jolmen aýa jiberetin qurylǵy, jańa týylǵandardy jetildirýge qajet kıývezder bar, qysqasy, ana men balaǵa, olarǵa kómek kórsetetin dárigerge qajet jaǵdaıdyń bári jasalǵan, – deıdi I.Úsenbek.
Qostanaı oblysy,
Rýdnyı qalasy
