Jazda indet órship turǵan mezette Densaýlyq saqtaý vıse-mınıstri Ajar Ǵınaıat koronavırýsqa qarsy 46 myń medqyzmetker kúresip jatqanyn, onyń ishinde 9 myńynyń dáriger ekenin aıtqan bolatyn. Vedomstvo ókiliniń aıtýynsha, dál qazir elimizge 1400-deı dáriger, 1700-deı medqyzmetker kerek. Sonymen qatar otandyq medısına salasy ınfeksıonıst, pýlmonolog, anestezıolog, reanımotolog sekildi mamandar tapshylyǵyn qatty sezinip tur.
Medısına mamandaryn daıarlaıtyn irgeli oqý orny S.Asfendııarov atyndaǵy Qazaq ulttyq medısınalyq ýnıversıtetin 2018 jyly 1 485 túlek bitirip shyqsa, 2019 jyly 1 314 túlek támamdaǵan. Al 2020 jyly ýnıversıtetti bitirip, eńbek naryǵyna aralasqan 1 271 túlektiń 815-in oqý orny basshylyǵy ózderi jumysqa ornalastyrsa, 452 stýdent óz betinshe jumys taýyp alǵan. Osy bilim ordasynda oqyǵan Aıbek Ermekbaev stýdent shaǵynan eńbekke aralasqan. Sodan da bolar ortalyq qalalyq klınıkalyq aýrýhanada koronavırýs dertine shaldyqqan naýqastardy alǵashqylardyń biri bolyp qabyldap, olarmen tikeleı jumys istedi. Ol epıdemııa abyr-sabyrǵa berilmeýdi, jyldam ári sapaly sheshim qabyldaýdy úıretkenin aıtady.
– О́zimdi qoryqpaımyn dep daıyndap, iske kiristim. Qoryqsań, bul salada júrýdiń ózi beker. Indet qatty órshigen kezeńde bir kún demalyp, eki táýlik qatarynan jumys istedik. Bir saǵat boıy obaǵa qarsy kostıýmdi kııý, sheshý, alty saǵat las aımaqta dárethanaǵa barmaı, sý ishpeı júrý óte qıyn. Biraq sonyń bárine tózdik. Jedel járdemmen kelgen naýqastardy qabyldap, tirkep, barlyq analızderin qarap shyǵyp, tıisti orynǵa – PTR-test nemese KT-ǵa jiberip otyramyz. Shuǵyl operasııa jasalýy kerek naýqas tússe, onda dereý operasııalyq blokqa kirip, operasııaǵa daıyndalamyz. Bul kezeń biz úshin ári synaq, ári úlken tájirıbe bolyp jatyr, – deıdi operasııalyq bólim meıirgeri Aıbek.
Jas mamannyń sózinshe, ádepkide koronavırýs juqtyrǵan naýqastar qatty shoshyp, aınalasyna agressııasyn tanytqan.
– Olar qandaı kóńil kúımen kelse de qabyldap, áńgimelesip, qorqynyshyn basýǵa tyrysamyz. Mundaı kúıge túspes úshin memleket aıtyp jatqan nusqaýlardy oryndaýymyz kerek. Maska taǵyp, antıseptık seýip júrýmen sharýa bitpeıdi. Aýrýdy jeńý úshin adam kóp shoǵyrlanǵan jerlerden aýlaq bolyp, toı-jıyn jasaýdy doǵarý kerek. Kóp adam áli qulaq aspaı jatyr, – deıdi jas maman.
Almaty balalar qalalyq klınıkalyq juqpaly aýrýlar aýrýhanasynda №5 bólim meńgerýshisiniń mindetin atqaryp júrgen Baıan Ospanbaeva da 2013 jyly S.Asfendııarov ýnıversıtetin «Jalpy medısına» mamandyǵy boıynsha bitirip shyqqan.
– Karantın kezi qıyn tıdi. Otbasymyzdan jyraqtap, qonaqúıde turdyq. Áriptesterimiz vırýs juqtyrǵan kezde bizdiń de qorqynyshymyz údep ketti. №12 aýrýhanada indet juqtyrǵandar kúrt kóbeıip ketken soń naýqastaryn bizge jiberip, bizdi «Hırýrgııalyq bólim» etip jasaqtady. Men pedıatrııany oqyǵan soń hırýrgııanyń qyr-syryna tolyq qanyq emespin. Sondyqtan qalalyq jedel shuǵyl kómek kórsetý aýrýhanasynan eki hırýrgti jiberdi. Solarmen jumys istep, biraz qıyndyqty eńserdik. Alaıda keıin ol eki hırýrgtan vırýs tabylyp, taǵy eki aptaǵa karantınge jiberdi. Áıteýir test nátıjesi «teris» bolyp shyǵyp, qaıta jumysqa kiristik. Jumys ýaqytynyń tańǵy 8-de bastalyp keshki 6-da aıaqtalatynyna qaramastan, jıi-jıi tún jarymǵa deıin qalyp qoıamyz. Las aımaqqa kirip, naýqastardy aralaımyz. Kim shyǵady, kimge kıslorod kerek, kimniń hali aýyr, kimdi KT-ǵa túsirý kerek bárin anyqtap, tıisti em taǵaıyndap, sharalar qabyldadyq, – deıdi Baıan.
Baıannyń joldasy Nurjan da qalalyq jedel shuǵyl kómek kórsetý aýrýhanasynda dáriger-travmatolog bolyp jumys isteıdi. Ekeýi eki bala tárbıelep otyr.
Abaı AIMAǴAMBET,
«Egemen Qazaqstan»
ALMATY
