Marına Angaldtiń aıtýynsha, «Vozrojdenıe» nemister qoǵamynyń músheleri «Biz birgemiz!» respýblıkalyq sharasyna qatysyp, qaıyrymdylyq, janashyrlyq tanytyp, zeınetkerlerge, ardagerlerge, az qamtamasyz etilgen otbasylaryna qoldaý kórsetti.
Indet taraǵan ýaqyttan beri qoǵamdyq birlestik músheleri oblystaǵy balalar úılerine, mektepterge, qıyn jaǵdaıǵa tap bolǵan oblys turǵyndaryna jedel kómekke keldi. Mysaly, V.Rýf basqaratyn «Rýbıkom» jáne A.Kasısyn basqaratyn «Galıskoe» seriktestikteriniń demeýshiligi esebinen 20 mıllıon teńgeden astam qarjy qaıyrymdylyq sharasyna jumsalǵan.
Jelezın aýdanynda turatyn Nına Gerbert kóp jyl boıy áleýmettik volonter. Osy aýdanda turatyn nemis ultynyń ókilderine áleýmettik turǵydan janashyr, qazir Lıdııa Ottoǵa qarasýda. Al Lıýdmıla Sıpıı bolsa 2015 jyldan bastap áleýmettik volonter qatarynda qysylǵanǵa qol-ushyn berip júr. О́ńirdegi Ýspen, Jelezın, Ertis, Tereńkól, Pavlodar aýdandarynda nemis ultynyń ókilderi turady. Lıýdmıla ózi turatyn aýdanda oblystyq «Vozrojdenıe» qoǵamynyń negizinde Ýspenka aýylynda turatyn jalǵyzilikti qarttarǵa, aýrý jandarǵa kómektesedi. Birlestik músheleriniń árqaısysy «Jaqynyńa janashyr bol!» atty qazaqstandyq áleýmettik qaıyrymdylyq sharalaryna qatysady.
Lıýdmılanyń aıtýynsha, ol «Úıdegi qamqorlyq» jobasyn tańdaǵan. Osy joba arqyly toptaǵy 5 adam qarttarǵa kóktemde kartop, kókónis egýge kómektesse, jazda baqsha sýarady, aram shópterin julady, kúzde ónimderin jınap beredi.
– Mine, qazir qys ta keldi. Qart adamdarǵa baryp úıleriniń aýlasyn qardan tazalaımyz, otyndaryn jınap beremiz. Kúndelikti turmysqa qajetti barlyq sharýalaryn atqaramyz. Zeınetkerlerge «Vozrojdenıe» qoǵamy syılyqtar tartý etedi, nemis ultynyń ókilderi sonaý bir qýǵyn-súrgin jyldary qazaq jerinen pana tapty, – deıdi Lıýdmıla.
«Vozrojdenıe» qoǵamy tóraǵasynyń orynbasary Olga Lıtnevskaıanyń aıtýynsha, jergilikti Assambleıada el birligi maqsatynda atqaryp jatqan ózge de jumystary az emes. Budan basqa, qazir jalpy, «Elimizde turyp jatqan nemis ultynyń ókilderine áleýmettik-gýmanıtarlyq qoldaý kórsetý» jobasy da bastaldy. О́ńirimizde qazir 20 myńdaı nemis ultynyń ókilderi turady. Qaıyrymdylyq kómek azyq-túlik sebetteri, dári-dármek alýǵa ketken shyǵyndardy óteý túrinde kórsetiledi. Kómek eń birinshi kezekte tótenshe jaǵdaı jáne karantındik shekteýler kezinde tabysynan aıyrylǵan otbasylaryna, jumyssyzdarǵa, barlyq múgedekterge, múgedek balalardy tárbıelep otyrǵan otbasylarǵa jáne zeınetkerlerge kórsetiledi.
Pavlodar oblysy
