Almaty qalasy «Áleýmettik medısınalyq saqtandyrý qory» KeAQ fılıalynyń dırektory Tileýhan Ábildaev Almaty qalasy óńirlik kommýnıkasııalar qyzmetiniń alańynda brıfıngte osy máseleniń jaı-japsary jaıly keńirek áńgimeledi.
– 15 qarashaǵa deıin emhana aýystyrý múmkindigin 10 myń almatylyq paıdalandy. Al tirkeý naýqanyna 77 medısınalyq uıym qatysty. Medısınalyq saqtandyrý qorymen kelisim aıasynda jumysyn 2021 jyldan bastaıtyn jańa uıymdar da bar. Emhananyń úı mańyna jaqyn bolǵany durys. Bul qajet bolǵan jaǵdaıda dárigerdiń úıge kelip jedel kómek kórsetýine yńǵaıly bolady. Ásirese pandemııa jaǵdaıynda emhananyń úıge jaqyn bolýy ózektiligin dáleldep otyr. Sondaı-aq bir otbasynyń bir emhanaǵa tirkelgeni jón. Otbasylyq dáriger otbasy múshelerin túgel bilgendikten, naýqasqa meılinshe tıimdi em taǵaıyndaıdy, – dedi T.Ábildaev.
Onyń aıtýynsha, eger azamat turǵylyqty jerin, jumysyn jáne oqýyn aýystyrsa, sonymen qatar tirkelgen emhana qaıta qurylsa nemese jumysyn toqtatsa tirkelgen emhanasyn aýystyra alady. Turǵyndardyń emhana aýystyrýyna bir jylda bir ret qana múmkindik beriledi.
Bıyl 9 aıda medısınalyq saqtandyrý qory Almaty qalasy boıynsha medısınalyq kómek úshin 307 mlrd teńge bólgen. Qańtar-qyrkúıek aralyǵynda stasıonarlyq medısınalyq kómek kórsetý maqsatynda 19 mlrd teńgeden astam qarjy jumsalǵan. Sondaı-aq dıagnostıkalyq-keńes berý baǵytynda 6,5 mlrd teńge jumsalǵan. Azamattar úshin eń ózekti qyzmettiń MRT ekeni anyqtalǵan. 5,9 mlrd teńgeden asa qarjy joǵary tehnologııalyq qyzmetter úshin bólingen. Qarajattyń qalǵan bóligi profılaktıkalyq sharalar, qalpyna keltirý kómegi men medısınalyq saýyqtyrýǵa baǵyttalǵan.
– 2017 jyldyń shildesi men 2020 jyldyń qarashasy aralyǵynda mindetti áleýmettik medısınalyq saqtandyrý qoryna Almaty qalasynan 85 mlrd teńge tústi. Onyń 70 mlrd teńgeden astamy jumys berýshilerdiń qarajat bólýinen quralǵan. Qalǵan soma jeke kásipkerlerdiń jarnasy men azamattyq kelisimshart arqyly jumys isteıtin azamattardan tústi, – deıdi spıker.
Tirkelý kampanııasy kezinde turǵyndardyń tańdaýy negizinen memlekettik medısınalyq uıymdarǵa túsken. Sonymen qatar spıker jeke emhanalarǵa memleket tarapynan qandaı talaptar qoıylatynyn da aıtty.
– Jyl saıyn jeke klınıkalar sany artyp keledi. Bul jaqsy úrdis báseke men sapany da arttyrady. Talapqa kelsek, olardyń medısınalyq qyzmetti kórsetýge lısenzııasy bolýy kerek. Mindetti áleýmettik medısınalyq saqtandyrý qorynyń bazasyna talaptarǵa saı tirkelýi tıis. Sol bazaǵa tirkelgen emhanalar ǵana tirkelý naýqanyna qatysady, – dedi T.Ábildaev.
Emhanaǵa tirkeý byltyrdan beri elektrondy úkimet portaly arqyly júrgiziledi. Spıkerdiń aıtýynsha, tirkeýdiń avtomatty túrde júzege asýy emhanaǵa syrttaı tirkeý faktileriniń aldyn alýǵa kómektesedi. Buǵan sońǵy jyldary tirkeýge qatysty shaǵymdardyń kúrt azaıýy dálel.
Abaı AIMAǴAMBET,
«Egemen Qazaqstan»
ALMATY
