«Jaqsylyq etseń jasyr, jaqsylyq kórseń asyr» deýshi edi atam qazaq. Úndemesten úlken is tydyryp júrgen jastardyń ıgi sharýalaryn aıtpaı qalýǵa bolmas. Ásirese bıyl, aty jaman indet eldi úreılendirgen tusta tarbaǵataılyqtardyń uıymshyldyǵyna kópshilik qyzyǵa qaraǵan. Dendegen dertke tótep berýi úshin bári bir atanyń balasyndaı ortaq qazanǵa qarjy jınap, aýdannyń aýrýhanalaryna ókpeni jasandy jeldetý apparattarynan bastap usaq-túıek kerek-jaraqtaryna deıin alyp bere qoıǵan. Uıymshyldyq degen sol emes pe?!
Sondaı-aq volonterler Ekpin, Qumkól jáne Aqsýat aýyldaryndaǵy jalǵyzbasty analardyń baspanaly bolýyna kómektesken. Jańaaýylda jastar demeýshiligimen aýyldyń bir kóshesine jaryq tartyldy. Endi bul aýylda «Jastar úıine» jóndeý jumystary júrgizilip, aýyldyq okrýg ákimdiginiń balansyna berilmek.
Aýdandaǵy «Barqytbel jastary» qoǵamdyq birlestigi bıyl aýyldyq jerlerdegi úkimettik emes uıym áleýetin arttyrý maqsatynda uıymdastyrylǵan granttyq jobaǵa qatysyp, 500 myń teńge grantqa ıe bolǵan. Olar utyp alǵan qarjyǵa jastarǵa arnalǵan «Kovorkıng» ortalyǵyn ashýdy qolǵa alǵan. Sonymen qatar uıym jastary múmkindigi shekteýli jandarǵa, qarttarǵa, jalǵyzbasty analardyń úılerine ár senbi saıyn járdemdesip, qaıyrymdylyq aksııasyn uıymdastyrýdy dástúrge aınaldyrǵan.
Tótenshe jaǵdaı kezinde «Barqytbel jastary» volonterler toby aýdan turǵyndarynyń qaýipsizdigi úshin aqparat materıaldary men tegin maskalar taratty. Sanıtarlyq beketterde turǵan qyzmetkerlerge tamaq aparyp berip júrdi. Qaıyrymdy jastar tótenshe jaǵdaı kezinde múmkindigi shekteýli jandar men qarttardy da azyq-túlikpen qamtamasyz etip otyrdy.
Turǵyndarǵa paıdaly aqparat taratý maqsatynda áleýmettik jelide «Jastar ortalyǵy» atty paraqsha ashylyp, azamattar mazalaǵan suraqtaryna jaýapty sol jerden tapqan.
Aýdandaǵy belsendi jastar arasynda volonterlik jumystardan bólek memlekettik Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy arqyly bıznes ashýdy kózdegender de bar. «Jas kásipker» jobasy aıasynda 20 jas grant alýǵa úmitker jáne 13 jas «Bastaý» jobasyna qatysqan. Aldaǵy ýaqytta 150 jasty kásiptik mamandyq ıgerýge oqytý josparlanyp otyr. Sonymen qatar, BIRGEMIZ jobasy aıasyndaǵy granttyq jobaǵa 3 joba usynyldy. Sonyń biri «Birgemiz Asyl mura» jobasy aıasynda Nazerke Qyzyrova grant utyp alyp, tarıhı-mádenı oryndarǵa volonterlerdi tartý jumystaryn júrgizip jatyr. Jazǵy maýsymda joba aıasynda volonterler Eleke sazy jaılaýyna ekskýrsııaǵa baryp, týǵan jer tarıhymen tanysyp qaıtty. Jobanyń negizgi kózdegeni, Tarbaǵataı shekaralyq aımaqqa jatatyndyqtan jastardy aýdanǵa tartyp, aýdan halqynyń sanyn arttyrý.
– Jas maman tyń ıdeıalarymen aýdanǵa kelip jatsa, kadr tapshylyǵy bolmas edi. Aýdannyń áleýmettik-ekonomıkalyq ahýaly joǵarlaıdy. Jalpy jastardyń aýdanda da ósip-órkendeýine jaǵdaı jasalǵan, – deıdi joba jetekshisi Nazerke Qyzyrova.
Tarbaǵataı talanttardyń jeri. Jýyq arada jas ónertapqyshtardy qoldaý maqsatynda Tarbagatai inventor atty jas ónertapqyshtar kórmesin ótkizý josparlanyp otyr.
Shyǵys Qazaqsta oblysy,
Tarbaǵataı aýdany
