Bilim ordasynyń ujymy Tuńǵysh Prezıdent dárishanasynyń akademııa qabyrǵasynda ashylýy zańdylyq ári ustazdar men kýrsanttar úshin úlken mártebe dep biledi. Sebebi joǵary oqý ornynyń qurylýy men qalyptasyp, damýy Elbasy esimimen tyǵyz baılanysty.
Qostanaı akademııasy – táýelsizdik tarıhynda Tuńǵysh Prezıdent arnaıy tabaldyryǵyn attaǵan Ishki ister mınıstrliginiń birden-bir oqý orny. 1997 jyldyń 1 naýryzynda Ishki ister mınıstrliginiń Qostanaı joǵary mektebine Qazaqstan Respýblıkasynyń Tuńǵysh Prezıdenti N.Á. Nazarbaevtyń Jarlyǵymen bekitilgen oqý ornynyń týy tapsyrylsa, osy jyldyń 16 shildesinde Memleket basshysy Qostanaıǵa jumys sapary barysynda atalǵan bilim ordasyna arnaıy at basyn buryp, oqý ordasy ujymynyń jumysymen tanysty.
– Oqý ornynyń jumysyn joǵary baǵalaǵan Prezıdent qurmetti qonaqtar kitabyna: «Qostanaıdaǵy tuńǵysh Joǵary mılısııa mektebine, onyń shákirtterine Otanyna adal qyzmet etýin tileımin» degen tarıhı jazba qaldyrdy. Bul óz kezeginde, alǵa qoıylǵan mindetterdi atqarýǵa sony serpin, tyń tynys syılady. Mine, osy sebepti de, akademııa bazasynda ashylǵan aýdıtorııanyń mańyzy biz úshin erekshe jáne árqaısymyz ol kisige qarap boı túzep, ónege alýymyz kerek, – deıdi akademııa kýrsanttary.
Jańa dárishananyń tórindegi sórege Tuńǵysh Prezıdenttiń ár jyldary jaryq kórgen eńbekteri qoıylǵan. Onyń ishinde Elbasynyń balalyq shaǵynan bastap, kemeńgerlik jyldaryn tutas qamtıtyn ómir joly men tarıhı estelikteri, Uly dalanyń birneshe myńjyldyq tarıhynan syr shertetin qazaq, orys jáne aǵylshyn tilderinde shyqqan qundy kitaptar bar.
Zamanaýı tehnologııamen jabdyqtalǵan Elbasy dárishanasynda kýrsanttar men tyńdaýshylarǵa arnalǵan ǵylymı-tájirıbelik konferensııalar men semınarlar ótkiziletin bolady.
Qostanaı oblysy
