11 qarasha kúni Hromtaý aýdandyq aýrýhanasyna ishi aýyryp, qusý belgilerimen jatqyzylǵan bala úsh kúnnen soń oblystyq juqpaly aýrýlar aýrýhanasyna aýystyrylǵan. Bul jerde balanyń vırýstyq pnevmonııaǵa shaldyqqany anyqtaldy.
«Koronavırýsqa PSR-taldaý nátıjesi teris bolǵanyn kórsetti. Alaıda bala qaıtys boldy. Qazir osy bala ólimine baılanysty qurylǵan komıssııa tekserýdi bastady», dedi B.Izbasarov.
Qazirgi kezde oblystyń 44 turǵyny vırýstyq pnevmonııadan em qabyldap jatyr. Onyń 11-i – Qarǵaly, Mártók, Shalqar, Hromtaý aýdanynyń turǵyndary. Eki apta buryn koronavırýs ınfeksııasyn juqtyrǵan mektep oqýshysy anyqtalǵan Shalqar aýdanyndaǵy Qorǵantuz orta mektebi, Aqtóbe qalasyndaǵy úsh balabaqsha da karantınge jabyldy.
Oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva óńirde epıdemııalyq jaǵdaı turaqty bolǵanymen, jurtshylyq karantın talaptaryn saqtamasa, jaǵdaı áp-sátte ózgerýi múmkin ekenin habarlady. О́ıtkeni tek sońǵy táýlikte ǵana oblysta koronavırýs ınfeksııasyn juqtyrǵan 8 jaǵdaı tirkeldi. Onyń beseýi – Aqtóbe qalasynyń, ekeýi – Mártók, bireýi Alǵa aýdanynyń turǵyndary. Karantınge qaramastan, shekaradaǵy jolaýshylar aǵyny tolastamaı otyr. Máselen, 6 qarashadan beri Qarǵaly aýdanyndaǵy «Álimbet» sanıtarlyq-ótkizý beketinen Reseı Federasııasynan árli-berli 7 893 adam, Mártók aýdanyndaǵy «Jaısań» beketinen 19 205 adam ótken. Bulardyń ishinen 27 jolaýshydan koronavırýs ınfeksııasy anyqtaldy. Olardyń 12-si tranzıttik kólik júrgizýshileri bolyp shyqty. Osy ýaqytta koronavırýs ınfeksııasyna tekserilgen PTR-anyqtamasy bolmaǵan 14 reseılik azamat elimizdiń shekarasynan keri qaıtarylǵan.
