Volonterlerden qurylǵan «Prometeı» qozǵalysynyń belsendileri osydan bir jyl buryn Narıman bazarynyń mańynan ǵımarat jaldap, joq-jitikke jylý jınaıtyn oryn ashqan. Sodan beri qaıyrymdy qala turǵyndary ózderinen artylǵan kıim-keshek pen basqa da turmystyq buıymdardy osy jerge ákep tapsyrýdy ádet etken. Munyń syrtynda, keıbir azamattar basy artyq kıim-keshegi, balaǵa arnalǵan oıynshyǵy bar ekenin habarlap qońyraý shalyp jatady. Belsendi azamattar mundaı mekenjaılarǵa ózderi baryp, bergenin osy dúken sóresine ákelip qoıady.
Qaıyrymdylyq dúkenine taıaýda qaladaǵy «Temirlan» áskerı-sport klýbynyń sportshylary kóptegen kıim-keshek túrlerin tartý etti.
– 30 jyl boıy balalarmen jumys istep, jastardy sportqa baýlyp kelemin. О́zimniń de balam men nemerem bar. Qalamyzda qaıyrymdylyq dúkeni bar ekenin jaqynda ǵana estidim. Mundaı ıgi sharadan tys qalýǵa bolmaıdy, birden ózim jattyqtyryp júrgen balalardyń ata-analaryna úndeý tastadym. Kóptegen jyly kıim, jaqsy buıymdar jınaldy. Tipti taıaýda ǵana óziniń saýda dúńgirshegin japqan bir ata-ana jap-jańa mektep kıimderin ákelip tapsyrdy, – dedi sport klýbynyń jetekshisi Rýslan Seksenbaev.
Temirlandyqtardyń qataryna Qostanaıdaǵy birneshe áskerı-patrıottyq klýb kelip qosyldy.
Qostanaı oblysy
