"20 qarasha kúni Nur-Sultanda № 248 karantındik sharalar týraly jańa qaýly shyqty, oǵan sáıkes maska taǵý, áleýmettik qashyqtyqty saqtaý, termometrııa, antıseptıkter men sanıtaızerlerdiń bolýy shart. SOO, saýda úıleri men ortalyqtarynyń, jabyq azyq-túlik jáne azyq-túlik emes bazarlardyń jumys kestesine ózgerister engizildi. Endi atalǵan saýda nysandary senbi kúnderi saǵat 09:00-den 20:00-ge deıin jumys isteıtin bolady. Biraq monıtorıngtik toptar karantın jáne shekteý sharalaryn buzý faktilerin anyqtaǵan jaǵdaıda, senbi kúnderi olarǵa jumys isteýge tyıym salynady. Jeksenbi kúnderi burynǵysha barlyǵy jabyq bolady. Jumys kúnderi saýda nysandary keste boıynsha 10:00-den 23:00-ge deıin jumys isteıdi" dedi Janna Pirálıeva.

Saýda obektilerinde ornalasqan sulýlyq salondary, atele, hımııalyq tazalaý, shashtaraz, aıaq kıim jóndeý sheberhanasy sııaqty qosymsha qyzmetter úshin jańa keste engizildi. Bul bıznes sýbektileri senbi jáne jeksenbi kúnderi 09:00-den 20:00-ge deıin jumys isteı alady.

"Eger demalys kúnderi SOO-da tek sýpermarketter men dárihanalar ashylsa, endi olarǵa qosymsha qyzmet kórsetetin shaǵyn bıznes sýbektileri de qosylady", dep túsindirdi elordanyń bas sanıtarlyq dárigeri.

Bul rette saýda obektilerine kelýshiler ǵımarattyń 30%-yn ǵana toltyrýy kerek, ıaǵnı bir kelýshige tórt sharshy metr tıesili bolýy tıis. Bul normany ǵımarat ákimshiligi de, jalǵa alýshylar da qadaǵalap otyrýy kerek. Eger adamdar kóp bolsa, olar adamdar aǵynyn shekteýi kerek.

Klıentter úshin maska taǵý jáne qashyqtyq saqtaý talaby saqtalady. Olardy buzǵan jaǵdaıda, jeke tulǵalar jaýapqa tartylady.