Aımaq basshysynyń aıtýynsha, bıyl oblysta «Nurly jer» memlekettik baǵdarlamasy men «Jumyspen qamtý jol kartasy» sheńberinde aýyldardy aýyz sýmen qamtamasyz etý maqsatynda iske qosylǵan 37 jobaǵa 9,6 mlrd teńge qarjy bólingen. Búginge deıin bul qarjynyń 81 paıyzy ıgerildi.
Aýyldy sapaly aýyz sýmen qamtýdy jedeldetý maqsatynda sońǵy jyldary oblys aýmaǵyndaǵy kóptegen eldi mekenderge sý taratý toraby ornatyla bastady. Qazir aýyldy sýmen qamtamasyz etý boıynsha jalpy quny 35 mlrd teńge bolatyn 41 joba ázirlenip jatyr. Aldaǵy ýaqytta jalpy sany 75,5 myń adam turatyn 69 aýylǵa ortalyqtandyrylǵan sý qubyry tartylady. 22 aýylǵa sý tazartý jáne taratý pýnktteri salynyp, 9 eldi mekenniń sý qubyry jańartylady.
– Osylaısha, aldaǵy eki jylda jalpy sany 180 aýyldy sapaly aýyz sýmen qamtamasyz etýdi josparlap otyrmyz, – dedi Arhımed Muhambetov.
Qostanaı oblysynda koronavırýstyq ınfeksııanyń alǵashqy tolqyny kezinde is júzinde ónerkásiptik kásiporyndardyń barlyǵy derlik ádettegi rejimde jumys istedi, shyǵarylatyn ónim kólemi saqtaldy. Kásiporyndardyń óndiristiń irkilmeýin qamtamasyz etý, shıkizat jetkizý, jumyspen qamtýdy saqtaý jónindegi sharalardy kózdeıtin daǵdarysqa qarsy josparlary bar. Agrarshylar da kóktemgi dala jáne egin jınaý jumystaryn ýaqtyly júrgizdi. Nátıjesinde jalpy óńirlik ónim shamamen 3%-ǵa ósedi dep kútilýde.
Aımaq basshysy bıyl oblystyń aýyl sharýashylyǵy tolyqtaı memlekettik qoldaýǵa ıe bolǵanyn aıtty. Jyl basynda oblystyń aýyl sharýashylyǵyn damytýǵa sýbsıdııa jáne bıýdjettik nesıe túrinde 38,4 mlrd teńge bólingen. Egin sharýashylyǵyna 13,8 mlrd teńge, mal sharýashylyǵyna 6,9 mlrd teńge bólinip, ózge baǵyttardy damytýǵa 17,7 mlrd teńge tıgen. Bıyl aýyl sharýashylyǵyna memleket ótken jylmen salystyrǵanda 5,4 mlrd teńge artyq qarjy bólip otyr.
– Osy jyly oblysta 4 mln 51 myń gektar alqapqa dándi jáne dándi-burshaqty daqyldar sebildi. Onyń ishinde 3 mln 438 myń gektarǵa bıdaı, 640,5 myń gektarǵa maıly daqyldar egildi. Jyl ótken saıyn astyqty óńirde maıly daqyldar alqabynyń kólemi ulǵaıyp keledi. Salystyrmaly túrde aıtsaq, jerdi ártaraptandyrý saıasatynyń tıimdi júrgizilýi nátıjesinde jyl ishinde maıly daqyldar alqaby 130,4 myń gektarǵa ulǵaıdy, – dedi ákim.
Arhımed Muhambetov oblystyń ekonomıkalyq damý kórsetkishterinde ósim bar ekenine toqtaldy.
– Bıylǵy jyldyń 10 aıynda negizgi makroekonomıkalyq kórsetkishter oń dınamıkaǵa ıe: ónerkásip óndirisiniń ósýi 6,9% – dy (onyń ishinde óńdeý ónerkásibinde – 19,3%), qurylys jumystary 23%-dy, turǵyn úıdi paıdalanýǵa berý – 9,5%-dy, aýyl sharýashylyǵy 21,3%-dy, al negizgi kapıtalǵa ınvestısııalardyń ósýi 11,0%-dy qurady, – dedi ol.
«Aýyl – El besigi» baǵdarlamasy bastalǵan eki jylǵa jýyq ýaqyt ishinde Qostanaı oblysynda 258 eldi mekende aýrýhana, mektep, balabaqshalar jóndeýden ótip, júzdegen kóshe bútindeldi. Byltyrdyń ózinde Áýlıekól, Meńdiqara, Qarasý, Sarykól jáne Fedorov aýyldarynda jalpy quny 2,2 mlrd teńge bolatyn 72 joba júzege asty. Aýyldy damytýǵa baǵyttalǵan ınfraqurylymdyq jobalardyń aýqymy bıyl edáýir keńeıe túsken.
Bıyl jyl sońyna deıin «Nurly jer» turǵyn úı qurylysy baǵdarlamasyn iske asyrý aıasynda oblysta barlyq qarjylandyrý kózderi esebinen 379,3 myń sharshy metr turǵyn úı salynady. Bul kórsetkish 2019 jylmen salystyrǵanda 13 %-dyq ósimdi qamtamasyz etýge múmkindik beredi.
«Sıfrly Qazaqstan» memlekettik baǵdarlamasyn iske asyrý aıasynda Qostanaı oblysynda 2020-2021 jyldarǵa arnalǵan oblystyq sıfrlandyrýdyń jol kartasy bekitildi, ol 91 is-sharadan turady. Jobalardy iske asyrýǵa 11,5 mlrd teńge, onyń ishinde memlekettik bıýdjetten 5,7 mlrd teńge, jeke ınvestısııalardan 5,8 mlrd teńge bólinip otyr. Memlekettik baǵdarlama bes baǵyttan turady. Ony oryndaý aıasynda ekonomıka, áleýmettik sala, TKSh jáne qalalardy basqarý salalarynda sıfrlandyrý júıelerin engizý boıynsha jumystar júrgizilýde.
Oblysta avtokólik qurastyrý salasynyń qarqyndy damyp kele jatqanyna erekshe toqtalǵan aımaq basshysy qazir óńirde 6 myń jańa jumys ornyn ashýǵa múmkindik beretin, jalpy quny 1,5 trln teńge turatyn 42 ınvestısııalyq joba jasalyp jatqanyn aıtty.
– Máselen, bıyl naýryz aıynda «SaryarqaAvtoprom» seriktestiginde ózbekstandyq áriptesterimizben birge «Chevrolet» avtokólikterin shyǵaratyn óndiris ornyn ashtyq. «AgromashHoldıng KZ» AQ-da aýylsharýashylyq tehnıkalarynyń bólshekterin shyǵaratyn lokalızasııalyq ortalyqty uıymdastyrý jumysy júrip jatyr. Oblystaǵy mashına qurylysynyń úlesi búginde 43,4%-ǵa jetip otyr. Al mashına óndirisi jyl basynan beri bir jarym esege deıin ulǵaıdy. Aldaǵy jyly «KamAZ» júk kólikterine arnalǵan jetekshi beldemeler shyǵaratyn shoıyn zaýytyn ashý josparlanyp otyr. Bulardyń bári eksport baǵytyndaǵy jobalar bolyp tabylady. О́nimniń 90 paıyzy Reseıdiń «KamAZ» zaýytyna jiberiletin bolady, – dedi A.Muhambetov.
Aımaq basshysy BAQ ókilderi tarapynan qoıylǵan saýaldarǵa jaýap berdi. «Qostanaıda taıaýda ǵana uly aǵartýshy Ybyraı Altynsarınge eskertkish qoıylǵanyn estip qýanyp qaldyq. Biraq osy eskertkishke jazylǵan aǵartýshynyń «Kel, balalar, oqylyq!» óleńinde bir emes, birneshe qate ketkenin estip, ishteı ókindik. Qate túzeldi me?» degen saýalǵa oblys ákimi:
– Músinshiniń bastapqy jobasynda bári durys bolǵan. Ony arnaıy komıssııa tekserip, maquldaǵan. Biraq músin Reseıde jasaldy. Qate sol jaqta jiberilip otyr. Biz bul qateni túzettik. Munyń syrtynda, bıyl oblys ortalyǵynda uzyndyǵy eki shaqyrym bolatyn Ybyraı Altynsarın kóshesi jóndeldi. Oǵan 9 mln teńgeden artyq qarjy jumsaldy. Sonymen qatar osy kóshede ornalasqan kóp qabatty turǵyn úılerdiń shatyrlary aýystyrylyp, qasbetteri jańartylyp, jyly ári zamanaýı qurylys materıaldarymen qaptalyp, qalamyzdyń ajaryn asha tústi, – dep jaýap berdi.
