Almaty ákimi Baqytjan Saǵyntaev Instagram-daǵy óziniń paraqshasynda pannonyń almatylyqtar úshin súıikti sáýlet beıneleriniń birine aınalǵanyn jazdy.
«Túıeler» sándik bederli pannosynyń avtory ári músinshi Pavel Shorohov kompozısııany bastapqy qalpyna keltirý týraly ótinishimdi maquldady. 1982 jyly jasalǵan panno Dostyq skverinde tur. Búginde ol almatylyqtardyń súıikti arhıtektýralyq beıneleriniń biri», - dep atap ótti B. Saǵyntaev.
Almaty ákimi Pavel Shorohov Almatynyń vızıttik kartochkasyna aınalǵan birqatar músindik týyndylardyń avtory ekenin eske saldy. Olar - Arbatta turǵan «Oıyndaǵy balalar», «Flamıngo», «Lotos», sondaı-aq Qazaq memlekettik sırkiniń janyndaǵy «Akrobatka», «Pantera», «Saıqymazaq» jáne t.b. Onyń jumystary Qazaqstan, Reseı, Germanııa, Avstrııa, Italııa mýzeılerine qoıylǵan.
P. Shorohovtyń aıtýynsha, qazir ol syrtqy qabyqty qalpyna keltirý jumystarymen aınalysýda.
«Kórip turǵandaryńyzdaı, mys qabyqtyń oń jáne sol jaq shetteri julynyp qalǵan. Kóp zııan keltirilgen. Mys qabatynyń shamamen úshten bir bóligi zaqymdalǵan. Modeldiń ózi temirbetonmen qurastyrylǵan», - dep túsindirdi avtor.
Osydan keıin chekankany qalpyna keltirý ári belgili bir reńk berý úshin tonırovka jasap, qabyqty retteý kerek. P. Shorohovtyń aıtýynsha, pannony qalpyna keltirý qıyn ári ony jóndeý úshin shamamen on kún qajet.
