Tirshiliktiń dybysyn óz qulaǵyńmen estý de bir baqyt. Qorshaǵan ortanyń áseri me, álde tuqym qýalaýshylyq pa, áıteýir qazirgi tańda jas balalardyń arasynda estý qabiletinen aıyrylǵandar sany kóbeıip tur. Sondaı kemshiliktermen kúresip, talaı sábıge tirshiliktiń dybysyn estý múmkindigin jasaǵan №5 qalalyq-klınıkalyq aýrýhanasynyń dárigerlerine eldiń aıtar alǵysy bólek.
Tirshiliktiń dybysyn óz qulaǵyńmen estý de bir baqyt. Qorshaǵan ortanyń áseri me, álde tuqym qýalaýshylyq pa, áıteýir qazirgi tańda jas balalardyń arasynda estý qabiletinen aıyrylǵandar sany kóbeıip tur. Sondaı kemshiliktermen kúresip, talaı sábıge tirshiliktiń dybysyn estý múmkindigin jasaǵan №5 qalalyq-klınıkalyq aýrýhanasynyń dárigerlerine eldiń aıtar alǵysy bólek.
№5 qalalyq-klınıkalyq aýrýhanada aýyz-qulaq qýystary men jaq-bet súıek aqaýlaryn qalpyna keltire biletin bilikti mamandar toby barshylyq. Bir aýysymda 375 syrqatty qabyldaı alatyn áıelderge arnalǵan emhanasy da bar. Qazir el úkimeti múgedek jandarǵa nazar aýdarýdy myqtylap jolǵa qoıdy. Sońǵy kezderi №5 qalalyq-klınıkalyq aýrýhanaǵa estý qabileti túrli deńgeıde nasharlaǵan syrqattar legi tolastamaı tur, solardyń deni jas balalar. Osyǵan oraı atalmysh aýrýhanada estý kemistigi bar balalar úshin sýrdologııalyq kómek, ıaǵnı, qoldyń kómegimen ymdap sóılesý júıesi tereńdetilip oqytylýda.
2007 jyldan bastap ortalyqta eresekter men balalardyń estý aqaýyn anyqtaý tártibi zamanaýı tásildermen júzege asyrylady. Jas balanyń nemese shala týǵan sábıdiń estý múmkindigin de naqtylaý qazir qıyndyq týdyrmaıtyn bolǵan. Sýrdo-fonıatrıkalyq ortalyqtyń mamandary tek Almaty qalasynyń turǵyndaryn ǵana emes, sonymen qatar «Densaýlyq saqtaýdyń biryńǵaı júıesi» aıasynda barsha qazaqstandyqtarǵa dárigerlik kómegin aıamaıdy.
Qazir №5 qalalyq-klınıkalyq aýrýhananyń dárigerleri estý qabiletin qalypqa keltirý isimen aınalysatyn álemdik aldyńǵy qatarly emhanalarmen tyǵyz baılanys ornatyp otyr. Atalmysh mekemeniń mamandary ǵylymı-biliktilik baǵdarlamasyna sáıkes Germanııa, Avstrııa, Ulybrıtanııa, Izraıl, Ońtústik Koreıa, AQSh, Japonııa jáne Italııa, Polsha, Túrkııa, Danııa sııaqty memleketterdiń aýrýhanalary men emhanalarynda bolyp, sol elderden ákelinetin estý apparattarynyń qoldaný tásilderin de jetik meńgerý ústinde.
2010 jyldan bastap №5 qalalyq-klınıkalyq aýrýhananyń dárigerleri asa kúrdeli ota jasaý isin de óz qolyna aldy. 2011 jyldan beri turaqty túrde otandyq ortalyqtyń bilikti mamandary elimizdiń shalǵaı óńirlerine baryp, jergilikti dárigerlerdiń biliktiligin kóterý isin damytyp júr.
Adamnyń estý qabiletin qalpyna keltirýdiń bir joly «Kohlearlyq ımplantasııa» dep atalady. Bul jas sábılerge jasalatyn ota. Qalalyq-klınıkalyq aýrýhanada osy kúnge deıin jasalǵan 348 otanyń 99-y balalarǵa jasalyp otyr. Alaıda, ota sátti jasalǵanymen adamnyń sóıleý mánerin qalpyna keltirý kóptegen qıyndyqtardy týdyryp jatady. Sol sebepti ortalyqtyń sýrdopedagogtary, logopedteri men fonıator mamandary ota jasalatyn syrqatpen kún ilgeri jumys jasap, olardyń qatarǵa qosylyp ketýine kóp yqpal etedi.
Sýrdopedagogtardyń jumysyna estý qabileti shektelgen balalardyń ata-analarymen tyǵyz baılanysta bolyp, olarǵa óz sábıiniń estý qabileti durys jolǵa qoıylý joldaryn qamtamasyz etý tásilin úıretý isi de jatady. Qulaǵy estip, tili sóıleýge ıkemdelgen, kele-kele jalpy bilim berý mektepterinde bilim alý múmkindigine ıe bolǵandar da kóptep kezdesedi.
Densaýlyq saqtaý mekemesinde maman saıasatyn durys qoldana bilý de óner. Qazir atalmysh em ortalyǵynda 2 medısına ǵylymdarynyń doktory, 13 medısına ǵylymdarynyń kandıdaty, joǵary kásibı kategorııaǵa ıe 52 dáriger, 3 «Altyn belgi» ıegeri jáne ár jyldarda «Úzdik medısına qyzmetkeri» atanǵan jas dárigerler jumys isteıdi.
Qanat ESKENDIR,
«Egemen Qazaqstan».
ALMATY.
