Elordamyzda qarashanyń 25-28 kúnderi aralyǵynda Ońtústik Qazaqstan oblysynyń «Án-shashýym ózińe, mereıli Astanam» atty mádenı kúnderi aıasynda «Ońtústik-Sırk» mekemesiniń «Alaqaı, Balaqaı» qoıylymy ótti.
«Ońtústik-Sırk» memlekettik kommýnaldyq qazynalyq kásiporny táýelsizdigimizdiń 20 jyldyq mereıtoıy qarsańynda 2011 jyldyń 17 jeltoqsan kúni ashyldy. Osy merekelik oqıǵaǵa oraı Shymkent qalasyna Reseıdiń aty ańyzǵa aınalǵan Iý. Nıkýlın atyndaǵy sırktiń juldyzdary arnaıy shaqyrýmen óner kórsetken eken. Mekemeniń alǵashqy basshysy Sultan Sraıylov bolatyn. Ashylǵan kúnnen jumysyn júıeli túrde júrgizip kele jatqan sırk osy ýaqyt aralyǵynda úsh maýsymyn ashyp, úsh baǵdarlama qoıylymyn kórsetip úlgergen. Árbir jańa maýsymdy oblys boıynsha múmkindigi shekteýli mektep-ınternattarynyń, balalar úıiniń tárbıelenýshileri men áleýmettik az qamtylǵan otbasylardan shyqqan búldirshinderge arnalǵan tegin qaıyrymdylyq qoıylymmen ashýdy dástúrge aınaldyrǵan.
Eshbir sırk qoıylymy ıllıýzııasyz ótpeıtini belgili. Naq osy janr boıynsha Sergeı jáne Gýzal Mustafınder óner kórsetti. Ekinshi bólimde balalar asyǵa kútken ónerpazdarmen qatar, jan-janýarlar da ortaǵa shyqty. Qoıylym sońynda Oleg Kasatkın jetekshiligimen áýede ushqan ónerpazdar kórermenniń qoshemetine bólendi. Barlyq qoıylym boıy búldirshinderdiń júregine birden jol tapqan Erjık jáne Maha atty saıqymazaqtar ózderiniń kúlkili is-áreketterimen baýrap aldy.
Erlan Shyńǵysbekov, «Ońtústik-Sırk» memlekettik kommýnaldyq qazynalyq kásipornynyń bas dırektory mindetin atqarýshy: «Búgingi Astana qalasyna syılap otyrǵan baǵdarlama balalardyń jazǵy demalysyna oraı «Alaqaı, Balaqaı!» dep atalǵan edi. Budan bólek, búginde 2 baǵdarlama taǵy bar. Jalpy, sırkke maman daıyndaý maqsatynda J. Elebekov atyndaǵy estrada-sırk kolledjiniń dırektory B. Núsipjanovamen kelissózder júrgizip, ońtústik óńirindegi sırkke qyzyǵýshylyq tanytqan 5 talantty talapkerdi grantqa oqýǵa túsirýge muryndyq boldyq. Kelisim boıynsha bul stýdentter oqý bitirgen soń bizdiń sırkte jumyspen qamtylatyn bolady. Bul is-shara 2014 jyly da jalǵasyn tabady», – dedi.
Bul ujymnyń ónerpazdary 2012 jyly «Azııa jańǵyryǵy», «Shabyt» halyqaralyq festıvalderine, al 2013 jyly ulttyq arna uıymdastyrǵan «Juldyzdy sát», «Habar» arnasy uıymdastyrǵan «Aımaqtar alamany» telejobalaryna qatysyp, júldeli oryndarǵa ıe bolǵan. Táı-táı basyp kele jatqanyna qaramastan sırk ujymy edáýir isterdi tyndyryp jatyr. Bolashaqta talaı-talaı kórermendi qýanyshqa keneltetinine kúmán joq.
Nurzada KÚMISBEK,
L.N.Gýmılev atyndaǵy Eýrazııa ulttyq ýnıversıtetiniń stýdenti.
Sýretti túsirgen
Erlan OMAROV.
