Keshe Ál-Farabı atyndaǵy QazUÝ-de Qazaqstan Respýblıkasynyń Tuńǵysh Prezıdenti kúnine arnalǵan elimizdiń barlyq óńirlerindegi joǵary oqý oryndary jastarynyń basyn qosqan «Men jastarǵa senemin!» atty stýdent jastardyń respýblıkalyq patrıottyq festıvaliniń gala-forýmy ótti.
Keshe Ál-Farabı atyndaǵy QazUÝ-de Qazaqstan Respýblıkasynyń Tuńǵysh Prezıdenti kúnine arnalǵan elimizdiń barlyq óńirlerindegi joǵary oqý oryndary jastarynyń basyn qosqan «Men jastarǵa senemin!» atty stýdent jastardyń respýblıkalyq patrıottyq festıvaliniń gala-forýmy ótti.
Festıval aıasynda bir aı boıy aldyn ala habarlanǵan baıqaýlar boıynsha stýdenttik jumystar qabyldanǵan bolatyn. Baıqaýlar taqyryby «Elimizdiń ınnovasııalyq damýyna meniń qosqan naqty úlesim» atty stýdenttik áleýmettik mańyzy bar ınnovasııalyq jobalar baıqaýy, «Men óz elimniń gúldenýi úshin ne isteı alamyn» atty stýdenttik esse baıqaýy jáne «Men jastarǵa senemin!» taqyrybynda stýdenttik poezııalyq azamattyq-patrıottyq shyǵarmalar baıqaýy bolyp iriktelip, jas býyn ókilderiniń aldyna maqsatty jumys jasaý talaby qoıylǵan. Ár baıqaý boıynsha seksııalyq otyrystar ótip, qazylar alqasy júzden júırik shyqqandardy tańdap, sheshim shyǵardy. Uıymdastyrýshy komıtetke elimizdegi joǵary oqý oryndary stýdentterinen 1000-ǵa tarta jumystar kelip túsip, eń úzdik 300 avtor baıqaýdyń ekinshi kezeńi – gala-forýmǵa qatysýǵa shaqyrtý aldy.
Gala-forým aıasynda ár óńirden kelgen qatysýshylar Ál-Farabı atyndaǵy QazUÝ-diń «Keremet» jastar resýrstyq ortalyǵymen, stýdenttik bıznes-ınkýbatory, stýdenttik klýbtar jumysymen jáne stýdenttik ınnovasııalyq jobalar kórmesimen tanysty.
Gala-forýmnyń saltanatty ashylýyndaǵy quttyqtaý sózinde Ál-Farabı atyndaǵy QazUÝ rektory Ǵalymqaıyr Mutanov táýelsizdiktiń alǵashqy kúnderinen bastap Memleket basshysy Nursultan Nazarbaev qazaqstandyq jastardyń jan-jaqty damýy úshin barlyq qajetti jaǵdaılardy jasaýǵa kóp kóńil bólip kele jatqandyǵyn aıta kelip: «Qazaqstan-2050» Strategııasyn júzege asyrýda jastardyń róli erekshe ekenin atap ótti. Dál sizderdiń aldaryńyzda osy baǵdarlamanyń oryndalýy tur. HHI ǵasyrda Qazaqstandy quratyn jáne damytatyn sizder. Sondyqtan da búgin árqaısyńyz belsendi azamat, Otanymyzdyń patrıoty jáne respýblıkanyń damýyna óz úlesterińizdi qosýǵa umtylýlaryńyz qajet. «Men jastarǵa senemin!» respýblıkalyq patrıottyq festıvali stýdent jastardyń Qazaqstannyń bolashaǵy úshin patrıottyqty jáne azamattyq jaýapkershilikti kóterýge baǵyttalǵan. Biz osy festıval sizderdiń barlyqtaryńyz úshin ıdeıalar, bastamalar jáne naqty jobalarmen almasý alańyna aınalyp otyrǵanyna qýanyshtymyz», – dedi.
Festıvaldiń sheshýshi kúni О́.Joldasbekov atyndaǵy Stýdentter saraıynda nomınasııalar boıynsha festıval jeńimpazdaryn saltanatty marapattaý rásimi ótip, onda bedeldi mamandardan quralǵan táýelsiz qazylar toby árbir konkýrs boıynsha festıvaldiń jeńimpazdaryn anyqtady.
Atap aıtsaq, «Meniń el damýyna qosqan naqty úlesim» atty stýdenttik ınnovasııalyq jobalar baıqaýynda 1-shi oryndy jáne Ál-Farabı atyndaǵy QazUÝ-de bir jyl tegin oqý grantynyń sertıfıkatyn Ál-Farabı atyndaǵy Qazaq ulttyq ýnıversıtetiniń fızıka-tehnıkalyq fakýltetiniń stýdenti E.Úsenov jeńip alsa, 2-shi oryndy jáne Qazaqstan Respýblıkasy Bilim jáne ǵylym qyzmetkerleri kásipodaǵy qoǵamdyq birlestigi taǵaıyndaǵan arnaıy syılyqtyń ıegeri Qaraǵandy memlekettik tehnıkalyq ýnıversıtetiniń stýdenti D.Ahmetjanov atandy, al 3-shi orynnyń jáne «Jas Otan» jastar qanaty taǵaıyndaǵan arnaıy syılyqtyń ıegeri Qazaq ulttyq agrarlyq ýnıversıtetiniń stýdenti A.Iаsevıch dep tanyldy.
«Men óz elimniń gúldenýi úshin ne isteı alamyn» atty stýdenttik esse baıqaýynda 1-shi oryndy jáne Ál-Farabı atyndaǵy QazUÝ-de bir jyl tegin oqý grantyn M.О́temisov atyndaǵy Batys Qazaqstan memlekettik ýnıversıtetiniń stýdenti Á.Tasqalıeva, 2-shi oryndy jáne Qazaqstan Respýblıkasy Bilim jáne ǵylym qyzmetkerleri kásipodaǵy qoǵamdyq birlestigi taǵaıyndaǵan arnaıy syılyqty Q.I.Sátbaev atyndaǵy Qazaq ulttyq tehnıkalyq ýnıversıtetiniń stýdenti N.Kishkenebaev, 3-shi oryndy jáne «Jas Otan» jastar qanaty taǵaıyndaǵan arnaıy syılyqty Abaı atyndaǵy Qazaq ulttyq pedagogıkalyq ýnıversıtetiniń stýdenti M.Pazylbekov jeńip aldy.
«Men jastarǵa senemin!» atty jas aqyndar baıqaýynda 1-shi oryndy jáne Ál-Farabı atyndaǵy QazUÝ-de bir jyl tegin oqý grantyn L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń stýdenti A.Tilenshıev, 2-shi oryndy jáne Qazaqstan Respýblıkasy Bilim jáne ǵylym qyzmetkerleri kásipodaǵy qoǵamdyq birlestigi taǵaıyndaǵan arnaıy syılyqty Ál-Farabı atyndaǵy Qazaq ulttyq ýnıversıtetiniń fılologııa, ádebıettaný jáne álem tilderi fakýltetiniń stýdenti B.Myrzaqulov, 3-shi oryndy jáne «Jas Otan» jastar qanaty taǵaıyndaǵan arnaıy syılyqty S.Demırel atyndaǵy ýnıversıtettiń fılologııa fakýltetiniń stýdenti T.Jorabaı ıelendi.
Qazaqstannyń bolashaǵy – ónerli de óreli jas urpaqtyń basyn qosqan atalmysh festıvaldi Ál-Farabı atyndaǵy Qazaq ulttyq ýnıversıteti men Bilim jáne ǵylym mınıstrligi, Mádenıet jáne aqparat mınıstrligi, «Jas Otan» jastar qanaty men Almaty qalasy ákimdigi birlesip uıymdastyrdy.
Qanat ESKENDIR,
«Egemen Qazaqstan».
ALMATY.
