Almatyda 7011 tósek-orny bar 23 kovıdti stasıonar saqadaı saı tur. Pandemııa kezinde Almatyda úsh jańa ınfeksııalyq stasıonar salyndy – 2 modýldi klınıka jáne RV-90 gospıtali. Jeke ınvestısııalar esebinen eki klınıka qaıta quryldy.
«Klınıkalardyń materıaldyq-tehnıkalyq bazasyn nyǵaıtý boıynsha jumys júrgizilip jatyr. О́tken jyly mekemelerdi medısınalyq jabdyqtarmen jaraqtandyrýdy jańǵyrtýdyń úsh jyldyq baǵdarlamasy qabyldandy. Bıylǵy jyly 74 stasıonar men klınıkalar úshin 4197 birlik qural-jabdyq satyp alyndy», - dep habarlady Almaty ákimi B.Saǵyntaev.
Ákim keltirgen málimetteri boıynsha, jedel medısınalyq kómek kórsetý jumysy jáne naýqastardy baǵdarlaý jańa algorıtmge aýystyryldy. Jańa 35 jedel járdem kóligi satyp alyndy. 16 jeltoqsanǵa deıin qosymsha 50 mashına keledi. 2021 jyldyń basynda taǵy 50 kólik alynbaq.
Jalpyqalalyq zerthanalyq jeli men pasıentterdi dıagnostıkalaý jumysy ortalyqtandyryldy. Jalpy qýattylyǵy táýligine 14 myńnan astam PTR-zertteýlerin 22 myńǵa deıin keńeıtý múmkindigi bar.
Qalalyq stasıonarlar úshin tikeleı qoljetimdi KT, MRT, rentgen-sýretterdiń biryńǵaı banki quryldy. Jasandy ıntellektke negizdelgen AT platformasy ókpeniń eń kóp zardap shekken aımaǵyn anyqtaıdy. Ol dárigerlerge naqty dıagnoz qoıýǵa jáne em-domnyń sapasyn jaqsartýǵa kómektesedi.
Sonymen birge, ambýlatorlyq deńgeıde medısınalyq kómek kórsetýdiń mańyzdy býyny (túıini) bolyp tabylatyn alǵashqy medısınalyq-sanıtarlyq kómektiń jumysy kúsheıtildi.
«О́tken jyly biz jaqyn ornalasqan qoljetimdi jerden medısınalyq qyzmet túrlerimen qamtamasyz etý boıynsha úsh jyldyq qalalyq jospardy qabyldadyq. Barlyǵy 35 ambýlatorııa salynady. 16 ambýlatorııa iske qosyldy, kelesi jyly taǵy 11 ambýlatorııa paıdalanýǵa beriledi», - dep atap ótti megapolıs ákimi B. Saǵyntaev.
Birinshi eshelon stasıonarlaryn medısınalyq gazben, sonyń ishinde otteginiń ortalyqtandyrylǵan júıesimen qamtamasyz etý jónindegi jalpyqalalyq baǵdarlama iske asyrylýda. Qalanyń medısınalyq uıymdarynyń káriz sýlarynyń bıologııalyq qaýipsizdigi rejımi engizildi. Medısınalyq qaldyqtardy kádege jaratýǵa baqylaý kúsheıtildi.
