Atap aıtqanda, endi HQO menedjeriniń zańdy tulǵalardyń keńsesine baryp, memlekettik qyzmetterdi kórsetý múmkindigi qarastyrylǵan.
Bul jańashyldyqty paıdalaný úshin memlekettik korporasııa men zańdy tulǵa arasynda belgili bir kelisimshart jasalýy tıis. HQO mamany zańdy tulǵalardyń kerekti anyqtamalary men qyzmet etýine qajetti qujattar men ótinishterdi rásimdeýge kómektesedi. Osylaısha iri bıznes ókilderi, ekinshi deńgeıli bankter, qurylys kompanııalary sııaqty mekemeler halyqqa qyzmet kórsetý ortalyǵyna barmaı-aq, memlekettik qyzmetterdi ala alatynbolady.
«Jeke menedjer – klıentke sapaly qyzmet kórsetip, tıimdi usynys jasaıtyn maman. Ol kompanııanyń memlekettik qyzmetterge ketetin ýaqytyn únemdeıdi. Bul HQO-daǵy qyzmetkerlerdiń júktemesin de azaıtyp, jeke tulǵalarǵa memlekettik qyzmet kórsetý úrdisin yńǵaıly ete túsedi. Biz árdaıym qyzmet kórsetý prosesin jaqsartýǵa tyrysamyz», – deıdi memlekettik korporasııanyń basqarma tóraıymy Ásemgúl Baltasheva.
Búginde memlekettik korporasııa klıent qalaýyna baǵdarlanǵan is-sharalardy qarastyryp jatyr. Osy rette, jańadan kólik satyp alǵan azamattar HQO-ǵa barmaı-aq, kóliktiń tehnıkalyq pasporty men memlekettik tirkeý nómiri belgisin úılerine jetkizip berý qyzmetin paıdalana alady. Ol úshin kólikti onlaın rásimdegennen keıin portaldaǵy «Kólik jáne kommýnıkasııalar» bóliminen tıisti qyzmetti tańdaý qajet. Qyzmet aqysy tólengennen keıin, avtoHQO kýreri qujat pen tirkeý nómirin bir kún ishinde jetkizip beredi.
Kelesi jyldan bastap qazaqstandyqtar dál osylaısha úılerine jeke kýálik, balanyń týý týraly kýáligi sııaqty qujattardy jetkizýge tapsyrys bere alatyn bolady. Búginde ol úshin arnaıy servısterdi iske qosý jumysy pysyqtalyp jatyr.
