Sońǵy on shaqty jyldyń ishinde Qostanaı turǵyndarynyń ómir súrý sapasyn jaqsartý máselesindegi eń basty jetistik – halyqty turǵyn úımen qamtý máselesiniń ońtaıly sheshilýi desek qatelespeımiz. Árıne, Tobyl jaǵalaýyndaǵy shyraıly shahar turǵyndary túgeldeı baspanaly boldy deýden aýlaqpyz. Alaıda qazir burynǵydaı emes, turǵyn úı alýdyń tıimdi tetikteri men naqty júıesi qalyptasyp, talpynǵan jannyń aınalasy 3-4 jyldyń ishinde páterli bolýyna tolyq múmkindik bar. Búginde aımaqta tabysty júzege asyrylyp jatqan memlekettik baǵdarlamalar arqyly myńdaǵan otbasy «óz úıi – óleń tósegine» qol jetkizip jatyr. Oǵan qalanyń irgesinde boı kótergen jańa shaǵyn aýdandardyń shyraıyn asha túsken shýaqty tirshilik kýá. Qazirgi Qostanaıdyń syrt kelbeti de adam tanymastaı ózgergen. Qalanyń batysynda «Aeroport», soltústik-batysynda «Altyn arman», «Iýbıleınyı», «Bereke» dep atalatyn jańa shaǵyn aýdandar paıda bolyp, burynǵy shaǵyn shahar kádimgideı qanat jaıyp, keregesin keńeıte tústi.
Alaıda atalǵan shaǵyn aýdandardyń turǵyndary tańǵy jáne keshki qarbalasta ortalyqqa baratyn nemese keri qaıtatyn jol qatynasynyń qıyndap ketkenin aıtady. Qazir ekinshi Qostanaıǵa №8, 10, 12, 38-baǵyttardaǵy 4 avtobýs qatynaıdy. Turǵyndardyń aıtýynsha, jumysqa baratyn jáne jumystan qaıtatyn ýaqytta ıin tirestire jolaýshy tıep alatyn bul avtobýstarda indetke qarsy sanıtarlyq saqtyq sharalary saqtala bermeıdi. Buǵan da kóndigip qalǵan jurtty, ásirese, balalardyń jaǵdaıy qınaıdy.
– Qazir 1-4 synyptyń oqýshylary mekteptegi kezekshi toptarda bilim alyp jatyr. Ár topqa 15 baladan bólip tastady. Olardyń sabaǵy da ár ýaqytta bastalady. Eń basty másele, №28 gımnazııaǵa ekinshi Qostanaıdan keletin avtobýstyń joqtyǵy bolyp tur. Bizdiń shaǵyn aýdanda turatyn 33 ata-ananyń balalary osy mektepte oqyp jatyr. Báriniń aıtatyny sol, baıaǵy avtobýstyń joqtyǵy. Bizge №8 nemese №38-avtobýstyń biriniń baǵytyn ózgertip, balalarymyz oqıtyn gımnazııa arqyly júretindeı etip berse, sol da jeter edi. Áıtpese kún saıyn N.Nazarbaev dańǵylyndaǵy «Agromash» aıaldamasynan túsip qalamyn da, balamdy dedektetip beri qaraı mektepke deıin jaıaý kelemin. О́tkende erinbeı sanap shyqtym, aıaldamamen mekteptiń arasy 800 metrden asyp ketedi eken, – deıdi «Iýbıleınyı» shaǵyn aýdanynynyń turǵyny Oralbaı Qabyl.
Balalary №28-mektep-gımnazııada oqyp jatqan 33 ata-ana Qostanaı qalasynyń ákimi Qaırat Ahmetovke ótinish bildirip, «Sizden suraıtynymyz, N.Nazarbaev dańǵylymen júretin №8 nemese №38-avtobýstyń biriniń Borodın kóshesine burylyp, Pobeda kóshesi arqyly óz baǵytyna qaıta túsetin etip ózgertýge kómektesińiz. Sonda tómengi synypta oqıtyn bizdiń balalarymyz mingen avtobýs mekteptiń janyndaǵy aıaldamaǵa toqtaıtyn edi. Bul mektepke de, balalarǵa da qolaıly. Biz balalarymyzdyń densaýlyǵyna alańdap otyrmyz. Alda alty aı qys bar. Qazirgi aıaldama men mekteptiń arasy tym uzaq. Osy máseleniń jedel sheshilýine kómektesýińizdi ótinemiz», degen mazmunda hat joldaǵan eken. О́kinishke qaraı, ata-analardyń ótinishi qala ákimdigi tarapynan qoldaý tappady. Qalalyq ákimdikke qarasty turǵyn-úı kommýnaldyq sharýashylyq, jolaýshylar kóligi jáne avtomobıl joldary bóliminiń bastyǵy N.Mýsın kómekten úmittenip otyrǵan ata-analarǵa №28 mektep-gımnazııaǵa qalanyń basqa aýdandarynan keletin qoǵamdyq kólik marshrýttaryn túgendeı kelip, mazmuny bulyńǵyrlaý jaýap hat joldapty. Hatta: «Sizder usynyp otyrǵan qoǵamdyq kóliktiń baǵytyn ózgertýge bolmaıdy. О́ıtkeni basqa jolaýshylarǵa keri áseri tıedi. Jol júrý uzaqtyǵy keminde 20 mınýtqa artady. Sondyqtan aıaldamadan túsken soń, kelesi kólikke minip mektepke jetýge bolady», dep jazylǵan.
Taýy shaǵylǵan ata-analardyń birazy balalary úshin endi ekinshi deńgeıli bankterdiń birinen nesıe resimdep, eski bolsa da, áıteýir qala ishinde júrip-turýǵa jaraıtyn jeńil kólik satyp alýdyń qamyna kirisip ketti.
Qostanaı oblysy
