Departament basshysynyń sózinshe, polıseıler jan shoshyrlyq qylmystyń izin sýytpaı ashqan.
3 jeltoqsanda Rýdnyı qalasyndaǵy páterde birigip spırtti ishimdik ishken 31 jáne 68 jastaǵy eki turǵyn sózge kelip, onyń arty janjalǵa ulasady. Janjal barysynda 31 jastaǵy er adam zeınetkerdiń moınynan pyshaq urǵan. Aýyr jaraqat saldarynan 68 jastaǵy jábirlenýshi sol jerde jan tapsyrǵan.
Qylmysker munymen toqtamaı, zeınetkerdiń basyn kesip alyp, ózi oqıǵa ornynan taıyp turady. Zeınetkerdiń denesin týystary taýyp, polısııaǵa habarlaǵan.
«Dereý jedel tergeý toby qurylyp, kúdikti izdestirile bastady. Eń mańyzdysy, qylmyskerdiń iz sýytyp úlgerýine múmkindik bermeý kerek. Qyzmetkerlerdiń kásibı sheberliginiń nátıjesinde kóp ýaqyt ótpeı kúdikti qolǵa tústi», - dedi Beket Aımaǵambetov.
Patrýldik polısııa qyzmetkerleri saǵat 22.00-den keıin kóshede mas kúıinde júrgen er adamdy tekserý barysynda onyń qolyndaǵy qandy baıqap qalyp, birden polısııa bólimine jetkizgen.
Kúdikti kóp sózge kelmeı, zeınetkerdiń jaýyzdyq jasaǵanyn moıyndady. Kúdikti qamaýǵa alyndy, oǵan qatysty tergeý sharalary júrip jatyr.
