Sonymen «Batyrlar men aqyndar eli» atanǵan Almaty oblysy Jambyl aýdanyndaǵy Uzynaǵash aýylynda qonys tepken Azamattyq qorǵanys júıesindegi Baýyrjan Momyshuly atyndaǵy 28237 áskerı bóliminiń qurylǵanyna 30 qarasha kúni 47 jyl toldy. Jarty ǵasyrǵa jýyq beleste áskerı bólimniń aıbyndy qutqarýshylary elimiz ben baıtaq jerimizdiń qaýipsizdigin qamtamasyz etý jolynda aıanbaı ter tógip keledi.
El táýelsizdigi jarııalanǵannan keıin Tótenshe jaǵdaılar jónindegi komıteti basshylyq quramynyń usynysymen 1995 jyly áskerı bólimge Keńes Odaǵynyń Batyry, Halyq Qaharmany, dańqty qolbasshy Baýyrjan Momyshulynyń esimi berildi.
О́tkenge kóz sala otyryp, áskerı bólimniń ózindik derbes tarıhy bar ekenin kóremiz. Áskerı bólimniń qalyptasýy men aıaǵynan tik turýyna tájirıbeli qutqarýshy mamandar, bilikti ofıserler men aryndy sarbazdar atsalysty. Qurylǵan kúninen bastap táýelsizdik jyldar belesinde bólim jeke quramy erlikter men batyrlyq úlgilerine toly dańqty jaýyngerlik joldan ótti. Túrli apattar, tabıǵı jáne tehnogendik sıpattaǵy tótenshe jaǵdaılardy joıýmen qatar qutqarý jumystaryn júrgizýde bólim jeke quramy respýblıkamyzdyń birshama óńirlerinde qyrýar jumys atqarǵan eken.
«1979 jyly bólimniń jeke quramy Medeý shatqalyndaǵy alapat órtti aýyzdyqtaýǵa, 1984 jyly Almaty oblysy Kegen aýdanyndaǵy orman órtin sóndirýge, 1993 jyly Almatyda tyrysqaq indetin joıýǵa, 1994 jyly Qyzylorda oblysy, Lenınsk (Baıqońyr) qalasynda qutqarý jumystaryn júrgizýge, gaz jarylysynan bes qabatty úıdiń qıraýy saldarynan qaza tapqan adamdardy qutqarýǵa, 1997 jyly burynǵy Taldyqorǵan oblysy Alakól aýdanyndaǵy Qazaq-Qytaı shekarasynda órtti sóndirýge, 1997 jyly iri kólemdegi tótenshe jaǵdaılar kezindegi TMD Korpýsynyń kúshteri birlesip áreket etý jónindegi oqý-ádistemelik jıyndarǵa, 1999 jyly AQSh-tyń Arızona shtatyndaǵy qutqarý qyzmetimen birge ótkizilgen «Aıver-99» Halyqaralyq oqý-ádistemelik jıyndaryna, 1999 jyly raketa tasymaldaýshy «Proton-3» apatynyń zardabyn joıýǵa, 2003 jyly Jambyl oblysy, T.Rysqulov aýdanyndaǵy Qulan aýylynda bolǵan jer silkinisiniń zardaptaryn joıýǵa, 2004 jyly Jambyl oblysy Jýaly aýdanynda qarda qalǵandardy qutqarý jumystaryna, 2007 jyly Jambyl aýdany ákiminiń ótinimi negizinde ótken selden keıingi Aqseńgir sýqoımasynda qaıtadan jóndeý jumystaryn júrgizýge, 2010 jyly Almaty oblysy Aqsý aýdany Qyzylaǵash eldi mekenindegi sý tasqynynyń zardabyn joıý men jergilikti turǵyndarǵa kómek kórsetý jumystaryn júrgizýge, 2011 jyly Ile-Alataý taýly bókterinde ótken daýyldy jel saldaryn joıýǵa, 2012 jyly Ońtústik Qazaqstan oblysynda bolǵan sý tasqynynyń zardaptaryn joıýǵa, 2013 jyly Jambyl oblysy Talas aýdany Qarataý qalasyndaǵy bolǵan daýyldyń zardaptaryn joıýǵa belsene qatysty», deıdi 28237 áskerı bóliminiń aǵa leıtenanty Aıdos Baıshaǵyrov.
Áskerimizdiń áleýetin kóterý maqsatynda Elbasy Jarlyǵymen 2015 jyldyń 21 sáýirinde «Qazaqstan Respýblıkasynyń Ulttyq ulany týraly» zań qabyldanyp, Ishki áskerge Ulttyq ulan mártebesi berildi. Sol jyly Qazaqstan Respýblıkasy Tótenshe jaǵdaılar jónindegi komıtetke baǵynysta bolǵan 28237 áskerı bólimi Ishki ister mınıstrligi Ulttyq ulannyń qaramaǵyna ótti.
Quqyqtyq tártip áskerleriniń qataryna kirgen áskerı bólimge jaýyngerlik daıyndyq ázirligi artylǵan barlyq qyzmettik-jaýyngerlik tapsyrmalardy óz ýaqytynda atqarýǵa múmkindik jasaldy.
Sonyń bir aıǵaǵy, 2015 jyly Almaty qalasy Naýryzbaı aýdanyndaǵy Qarǵaly, Kamenka eldi mekenderin sý basýdan týyndaǵan tótenshe jaǵdaı saldaryn joıýǵa qatysyp, turǵyndardy qaýipsiz aımaqqa kóshirip, apat alǵan oryndarda zalalsyzdandyrý jumystaryn júrgizýmen qatar memlekettik ákimshilik mekemelerdiń, mektepterdiń aýlalaryn laıdan tazartty. Sonymen qatar Ulttyq ulannyń quramynda bolǵan 28237 áskerı bóliminiń qutqarýshylary pandemııa kezinde 2020 jylǵy 5 mamyrdan bastap 21 mamyrǵa deıin Túrkistan oblysy Maqtaaral aýdanynyń eldi mekenderinde oryn alǵan tótenshe jaǵdaı apatynyń saldaryn joıýǵa qatysty. Nátıjesinde áskerı bólim qutqarýshylarynyń kúshimen eldi mekenderden 733 mal óleksesi, 100-den asa qustardyń óleksesi, sý basyp qalǵan úılerden turǵyndardyń jeke zattary shyǵaryldy. 208 turǵyn úıdiń, 1 mekteptiń jáne 1 balabaqshanyń aýlalary laıdan tazartyldy, sonymen qatar 122 tonna topyraq sebilip, joldar ashyldy, qum toltyrylǵan qaptar ázirlenip, bógetter jasaldy.
Elimizde koronavırýs beleń alǵan kezde memlekette Tótenshe jaǵdaılar mınıstrliginiń qajettiligi týyndap, Prezıdent Q.Toqaev óziniń bıylǵy Joldaýynda Tótenshe jaǵdaı mınıstrligin qaıta qurýǵa pármen berdi. Artynsha Prezıdent Jarlyǵymen Tótenshe jaǵdaı jónindegi mınıstrligi qaıta quryldy. Sonyń nátıjesinde IIM Ulttyq ulany quzyryndaǵy 28237 áskerı bólimi qaıta qurylǵan Tótenshe jaǵdaılar mınıstrliginiń qaramaǵyna ótti.
Mine, osynaý zańǵar joldyń belesinde ór rýhty qolbasshy B.Momyshuly atyndaǵy 28237 áskerı bóliminiń sarbazdary 47 jyl boıy Otan aldyndaǵy mindetterin atqarýda senimge selkeý túsirgen emes.
Almaty oblysy
