Shýchınsk qalasynyń 46 jastaǵy turǵyny ınternet jelisindegi belgili bir jarnamalyq saıtta aýdıo-beıne qurylǵysy bar avtoqalam-telefon satylatyny týraly habarlama ornalastyrǵan. Ony «Hi-Tech» jedel-aldyn alý is-sharasy negizinde Býrabaı aýdanynyń polısııa bóliminiń krımınaldyq polısııa bólimshesiniń qyzmetkerleri ınternet jelisine monıtorıng júrgizý barysynda anyqtady.
Mundaı qurylǵylar aqparatty jasyryn túrde aýdıoǵa jazý nemese beınekameraǵa túsirip alý úshin paıdalanylady. Osy oraıda, munymen aınalysatyndar Qazaqstan Respýblıkasy Qylmystyq Kodeksiniń 399-babyndaǵy «Aqparatty jasyryn alýdyń arnaıy tehnıkalyq quraldaryn zańsyz daıyndaý, óndirý, satyp alý, ótkizý nemese paıdalaný» bóliginde kórsetilgenindeı, jaýapqa tartylady.
Bul fakti sotqa deıingi tergeýdiń biryńǵaı tizilimine engizilip, qazirgi ýaqytta quraldy tekserý úshin saraptama taǵaıyndalǵan. Tergeý amaldary jalǵasýda.
Aǵymdaǵy jyldyń 27-28 qazan aralyǵynda oblys aýmaǵynda «Hi-Tech» jedel-aldyn alý is-sharasy ótkizildi. Jedel-aldyn alý is-sharasynyń negizgi maqsaty kıberqylmystardy anyqtaý, jolyn kesý jáne ashý, ınternet jelisi arqyly buryn jasalǵan urlyqtar men alaıaqtyqtardy ashý bolyp tabylady.
Aqmola oblysy
