Jańa kitaptyń tanystyrylymy Juban Moldaǵalıev atyndaǵy Batys Qazaqstan oblystyq ǵylymı ámbebap kitaphanasynda ótti. Tusaýkeserge Aıtqalı Nárikov, Aqushtap Baqtygereeva syndy tanymal qalamgerler, óńir basshylary qatysty.
– Kitap jazý – úlken eńbek. Shyǵarmashylyq ónerińizge Ábdijámil Nurpeıisov, Dýlat Isabekov, Aqushtap Baqtygereevalar joǵary baǵa berdi. Kitap jazý Ábdijámil aǵamyzdyń shyǵarmasynyń ataýymen aıtsaq «qanmen, termen» jazylatyn eńbek. Búgingi keshke osy jaǵdaıdy túsinetin, sizdiń shyǵarmashylyǵyńyzdy jaqsy kóretin jandar jınalyp otyr. Olardyń qatarynda biz de barmyz. Sizge shyǵarmashylyq tabys tileımiz, – dedi Batys Qazaqstan oblysy ákiminiń orynbasary Serik Egizbaev.
Alǵash ret 2014 jyly «Jazýshy» baspasynan jaryq kórgen «О́kinish» shyǵarmasyn belgili synshy, ádebıet zertteýshisi Baqyt Sarbalauly «búgingi kúnniń baısaldy prozasy» dep baǵalaǵan bolatyn. «Juldyz» jýrnalynda jarııalanǵan «Mıranyń mahabbaty» atty kólemdi maqalasynda synshy «О́kinishti» roman dep atap, «qazirgi ádebıetimizdiń ádemi de áleýetti úlgilerine jatady desek te jarasady eken» degen edi. Qazaqstan Respýblıkasy Mádenıet jáne sport mınıstrliginiń Til saıasaty komıteti «Mádenıet jáne óner salasyndaǵy báskelestikti joǵarylatý, qazaqstandyq mádenı murany saqtaý, zerdeleý men nasıhattaý jáne muraǵat isiniń júzege asyrylý tıimdiligin arttyrý» baǵdarlamasy aıasynda «Ádebıettiń áleýmettik mańyzdy túrlerin satyp alý, basyp shyǵarý jáne taratý» kishi baǵdarlamasy boıynsha 3 myń tırajben shyqqan bul kitap endi Qazaqstannyń barlyq óńirindegi kitaphanalarǵa tegin taratylmaq.
– Respýblıka kóleminde, jalpy ádebıette qazaq qyzdary kóp emes qoı, bilesizder. Proza jazý, kitap jazý – ońaı sharýa emes. Mıra adamdar taǵdyryn, qazaq qyzynyń, áıeliniń basynan ótetin sezimin qozǵap júrgen qalamger, – degen Aqushtap Baqtygereıqyzy jazýshynyń óz taǵdyry da ońaı bolmaǵanyn, jarynan erte aırylyp, jalǵyz qyzyn qatarǵa qosqan erligine erekshe toqtalyp ótti.
Iá, Mıra Hamzaqyzy ádebıet pen jýrnalıstıka salasyn qatar alyp júrgen qalamger. Oral qalasynyń ákimi Abat Shynybekov qalalyq «Jaıyq úni» gazetin biraz jyldan beri basqaryp kele jatqan jazýshyǵa alǵys hat tabys etip, jastarǵa oı salatyn, rýhanı kemeldenýine úles qosatyn kitap úshin rızashylyǵyn bildirdi.
Jańa kitaptyń tusaýkeserinde aqyn, Qazaqstan Jazýshylar odaǵy Batys Qazaqstan oblystyq fılıalynyń tóraǵasy Baýyrjan Halıolla, pedagogıka ǵylymdarynyń doktory, professor Shalqyma Qurmanalına, Mahambet atyndaǵy Batys Qazaqstan ýnıversıtetiniń dosenti, fılosofııa doktory Aıdarbek Aqbolatov jáne basqalary qalamgerdiń shyǵarmashylyǵy haqynda óz pikirlerin aıtty. Belgili óner qaıratkerleri Nurjan Sertekov, Murat Amanshıev, Maıra Haıdarova, Horlan Shámelova men Nurjııan Hasanovalar án men kúıden shashý shashyp, jazýshynyń shyǵarmalarynan monolog oqydy.
Kesh sońynda avtor Mıra Shúıinshálıeva oqyrmandaryna alǵysyn aıtyp, shyǵarmashylyq jolynda kómektesken, aq jol tilegen aǵa-apalaryna rızashylyǵyn bildirdi.
