Jedel járdem 11 jeltoqsan kúni saǵat 23.20-da shaqyrylyp, úsh brıgada jumys istedi. О́rt saldarynan 8 jasar er bala men 67 jastaǵy er adam jedel járdem kelgenge deıin kóz jumdy. Jeńil dárejede gazdan ýlanǵan 4 jasar qyz bala oblystyq balalar aýrýhanasyna jatqyzyldy.
Jeńil dárejede gazdan ýlanyp, jaraqat alǵan 43 jastaǵy er adam qalalyq kópbeıindi aýrýhanaǵa jetkizildi.
BQO TJ departamenti memlekettik órt baqylaý basqarmasynyń aǵa ınjeneri Saǵdat Ánestiń naqtylaýynsha, I.Kýlıchev kóshesi 13-mekenjaıynda órt bolyp jatqany jóninde saǵat 23:17-de habar túsken.
Aýmaǵy 80 sharshy metrdi qamtyǵan órt kezinde turǵyn úıdiń tóbe jabyndysy, jeke zattar men jıhaz janyp ketti. О́rt sóndirý qyzmeti kelgenshe, sol mańnan ótip bara jatqan azamat gazdan aýyr jáne jeńil dárejede ýlanǵan eki adamdy (bireýi – bala) qutqardy.
Olar aýrýhanaǵa jatqyzyldy. О́rt ornynan eki adamnyń múrdesi tabyldy. Oqıǵa ornynan 27 lıtrlik gaz ballony shyǵaryldy. О́rtti aýyzdyqtaýǵa jeke quramnan 14 adam, 5 tehnıka jumyldyryldy. Qazirgi kezde órttiń shyǵý sebebi anyqtalyp jatyr.
