Bordaqylaý alańdarynyń eń irisi Qarabalyq aýdanynda ornalasqan. Mundaǵy «Terra» jaýapkershiligi shekteýli seriktestiginde toǵyz myńdaı qara mal ósiriledi. Jyl sońyna deıin bul kórsetkishti eki ese arttyrý kózdelgen.
Seriktestik bordaqylaýǵa salmaǵy 200 keliden kem tartpaıtyn buqalardy qabyldaıdy. Qunarly azyqpen qorektendirip, buqalardyń salmaǵyn jarty tonnaǵa jetkizedi. Mundaǵy mal tuqymdarynyń basym bóligi – etti aberdın-angýstar. Olarmen birge jeke jáne fermerlik sharýashylyqtardyń qara maly da semirtilip jatyr.
– Maldy Qostanaı, Aqtóbe, Soltústik Qazaqstan oblystarynan qabyldaımyz. Batysqazaqstandyqtar da belsendi, sol jaqtan kóptep jetkiziledi. Qaraǵandy jáne Pavlodar oblysynyń sharýalarymen de tyǵyz baılanys ornattyq. Qazir eksportqa jol qaıta ashyq. Reseı maldy tirideı satyp alady. О́zbekstanmen de kelisim-shart jasastyq. Aldaǵy ýaqytta Qytaıǵa shyqsaq degen oıymyz bar, – deıdi «Terra» JShS dırektory Arman Esmurzın.
Onyń aıtýynsha, bordaqylaý alańynda jyl saıyn 30 myńdaı iri qara baǵylady eken. О́nimniń 70 paıyzy ishki naryqty qamtamasyz etse, qalǵany eksportqa jóneltiledi. Jaqyn arada munda modýldi mal soıý beketi ashylmaq. Joba júzege asyrylsa, aýyl fermerleri maldy qalaǵa tasymaldamaıtyn bolady.
Qostanaı oblysy,
Qarabalyq aýdany
