Osylaısha, Prezıdenttiń eldi mekender men aýyldyq jerlerdi kógildir otynmen qamtamasyz etý jónindegi tapsyrmasy iske asyp, Qordaı aýdanyna qarasty Aýqatty, Bular batyr, Sortóbe, Masanshy, Qarakemer, Qarasý, О́tegen, Qyzylsaı, Kúnbatys-1 jáne Kúnbatys-2 aýyldary gazben qamtamasyz etý jelilerine qosyldy.
Qysqa merzimde júzege asqan bul joba bıyl maýsym aıynda ǵana qolǵa alynǵan. Kúzdiń ortasynda, ıaǵnı 15 qazanda saltanatty jaǵdaıda Qarasý men О́tegen aýyldaryna kógildir otyn kirgizilgen edi. Kóp uzamaı, endi mine, Táýelsizdik merekesi qarsańynda 57 myńdaı turǵyny bar segiz eldi mekende gaz qubyrlarynyń qurylysy aıaqtalyp, jurttyń qoly jylý kózine jetip otyr.
Kompanııa mamandary atap ótkendeı, Qordaı aýdanynda 392 shaqyrymdyq gaz qubyry tartylyp, gaz taratý jelileri arqyly tabıǵı gaz áleýmettik jáne kásipkerliktiń 274 nysanyna jetkiziledi. Onyń ishinde, joǵaryda atap ótkendeı, 10 eldi mekenniń 7 myń shańyraǵy da bar.
О́ńir basshysy Berdibek Saparbaev 70 jyldan astam ýaqyt boıy Qordaıdy gazben qamtý máselesi sheshimin tappaı kelgenine toqtaldy. «Bıylǵy jyldy tarıhı dep ataýǵa bolady. El Prezıdenti qoldaýynyń arqasynda 100 myńnan astam turǵyny bar aýdannyń 22 aýylyn gazdandyrýǵa 10 mıllıard teńgeden astam qarjy bólindi. Nátıjesinde qordaılyqtardy kógildir otynmen qamtý deńgeıi 47 paıyzdan 95-ke deıin kóbeıedi. Mundaı aýqymdy jumystar bul aımaqta buryn-sońdy júrgizilgen joq», dep atap ótti oblys ákimi.
Osy qýanyshty kúnmen jerlesterin aýdandyq Qoǵamdyq kelisim Keńesiniń tóraǵasy Ábdibek Seıilhanov quttyqtady.
– О́zderińiz biletindeı, jyl basynda Prezıdent kelip ketken edi. Sol sapar barysynda biz Memleket basshysynan aýdandaǵy birqatar túıtkildi sheshýge járdem jasaýyn ótinip edik. Sol máselelerdiń ishinde gazdandyrý da bar. О́tinishimiz eskerýsiz qalǵan joq. Osy saltanatty sátke qatysy bar barsha janǵa alǵysymyzdy bildiremiz. Biz úshin bul aıtýly mereke jáne dúngen baýyrlarymyzben bas qosyp, bir-birimizdi quttyqtap, pikir almasatyn jaqsy sebep boldy. Bárimizdiń maqsatymyz – birlik, – deıdi Á.Seıilhanov.
«QazTransGaz Aımaq» AQ Jambyl óndiristik fılıalynyń dırektory Sáken Ismaılovtyń aıtýynsha, aýyldarǵa gaz jetkizetin qubyrlardyń qurylysy «Qordaı» avtomatty gaz taratý stansasyn (AGTS) jańǵyrtý jáne onyń ótkizý múmkindigin arttyrýmen qatar júrgizildi. Atalǵan jumystar Qordaı aýdanynyń taǵy 12 eldi mekenin gazdandyrýdy josparlaýǵa múmkindik beredi.
Nátıjesinde, Qordaıdaǵy 41 aýyldyń 29-y tolyqtaı gazdandyrylýy tıis. Demek, bul aýdan halqynyń kópshiligi gaz ıgiligin kóretin kún alys emes degen sóz.
Saltanatty jıynnan keıin oblys ákimi ózgelermen birge úıine gaz kirgizgen jergilikti turǵyn Mýsa Mashanlonyń shańyraǵyna bas suqty.
– Gaz qosylǵannan keıin bizde jańa ómir bastaldy. Úıimizde árdaıym jaılylyq pen jylý bolady. Elimizdiń basshylyǵy men gaz mamandaryna otbasymyzdaǵy qýanysh úshin alǵysymyz sheksiz, – dedi Sortóbe aýylynyń turǵyny Mádına Moldajanova.
Kógildir otyn oshaqty mazdatyp qana qoımaı, monsha, mektep, medısına mekemelerin de jylytyp, janǵa raqat syılaıtyny jurtty qýantyp otyr. Eń bastysy, tehnıkalyq qaýipsizdikti qaperden shyǵarmaý kerek.
Munan da bólek, ulan-ǵaıyr dalamyzdyń barlyq aımaqtaryna gaz jetkizý – elimizdiń ekologııalyq ahýalyna da tıgizetin septigi orasan. Onyń ústine kógildir otynǵa qatysty atqarylyp jatqan jobalar memleketimizdiń energetıkalyq qaýipsizdiginiń bir parasy bolǵandyqtan, Úkimet te bul máselege jiti nazar aýdaryp otyrǵany barshamyzǵa belgili.
Bul jerdegi obektıvti qıyndyqtar mynada, munaı-gaz ken oryndary negizinen respýblıkamyzdyń batys óńirlerinde ornalasqandyqtan, myńdaǵan shaqyrymdarǵa sozylǵan gaz qubyrlaryn tartyp, ony sáıkes ınfraqurylymdarmen qamtamasyz etý orasan kúsh, qomaqty qarajat pen ýaqytty talap etedi.
Qýantarlyǵy, «Saryarqa» gaz qubyry arqyly otandyq gaz jetkizilgen elordamyz Nur-Sultan qalasynyń alǵashqy júzdegen turǵyny bıylǵy qysty kógildir otynmen qarsy alyp otyr. Qazirgi kezde klımaty qatal, aýa raıy sýyq ortalyq pen soltústik úshin asa mańyzdy osy jobanyń ekinshi kezeńin iske asyrý isi josparlanýda.
Jambyl oblysy,
Qordaı aýdany
