Joǵary nagradalarmen marapattalǵandardyń arasynda dárigerler, muǵalimder, qoǵam qaıratkerleri, shyǵarmashylyq jáne ǵylymı zııaly qaýym ókilderi bar. Táýelsizdik kúnine oraı Almaty qalasynyń barlyǵy 76 turǵyny marapattarǵa ıe boldy.
Saltanatty jıynǵa qatysýshylar aldynda sóılegen sózinde Almaty qalasynyń ákimi Baqytjan Saǵyntaev Táýelsizdiktiń qundy mereke ekendigine toqtala kele: «Búgingi Qazaqstan – tabysty, qarqyndy damyp kele jatqan memleket, al bizdiń qalamyz Almaty – Táýelsizdiktiń altyn besigi. Táýelsizdik jylnamasynda almatylyqtardyń da úlesi bar ekenin maqtanyshpen aıta alamyz. Osy ýaqyt ishinde biz mańyzdy jetistikterge qol jetkizdik. Almaty bıznes pen jeke kapıtal shoǵyrlanǵan qalaǵa aınalyp, el ekonomıkasynyń besten bir bóligin jáne respýblıkalyq bıýdjettiń úshten bir bóligin qurady. Osy jetistikterdiń barlyǵy – memleket jáne qoǵam qaıratkerleriniń, ǵylym men bilim, mádenıet jáne sport, densaýlyq saqtaý, azamattyq qoǵam, memlekettik qyzmetshiler jáne áleýmettik qorǵaý, energetıka, kommýnaldyq sharýashylyq, kásipkerlik ókilderiniń eńbegi. Búgin sizderdiń elimiz ben megapolıstiń damýyna qosqan úlesterińiz joǵary memlekettik nagradalarmen laıyqty túrde marapattaldy», dedi.
Sonymen II dárejeli «Dostyq» ordenimen Qazaqstan-Fransııa Iskerlik keńesiniń teń tóraǵasy A. Káribjanov marapattaldy.
«Qurmet» ordenine 11 almatylyq ıe boldy, olardyń arasynda №5 emhana bas dárigeriniń orynbasary A.Abdrahmanova, eńbek ardageri Z.Ahmetova, №169 mektep-lıseıdiń dırektory G.Bekenova, «Qazaq onkologııa jáne radıologııa ǵylymı-zertteý ınstıtýty» AQ dırektory D.Qaıdarova, «Qazaq ádebıeti» gazetiniń bas redaktory Dáýret Qýatov, kompozıtor,«Qazaq avtorlar qoǵamy» RQB tóraǵasy B.Qydyrbek jáne basqalary bar.
III dárejeli «Eńbek Dańqy» ordenimen «Almaty Elektrotrans» JShS trolleıbýs júrgizýshisi R. Qalmuhambetovtiń, «Almatymetroqurylys» AQ taý-ken sheberi T.Qońyratovtyń, «Konkrıt Prodakts» JShS beton buıymdary sehynyń sheberi A.Sınıshınniń eńbekteri atalyp ótildi.
Birqatar qala turǵyndary qajyrly eńbekteriniń arqasynda «Eren eńbegi úshin» medalimen marapattaldy. Olardyń arasynda №83 gımnazııanyń fızıka pániniń muǵalimi L.Arataı, «Almatynyń ElektroShıt zaýyty» JShS dırektory M.Aýmoldaev, «Balalar men jasóspirimderdiń keshendi №5 mamandandyrylǵan sport-tehnıkalyq mektebi» MKQK aǵa jattyqtyrýshysy K.Eshenko bar.
«Shapaǵat» medalimen «Perınatologııa jáne balalar kardıohırýrgııasy ortalyǵy» MQK dırektory G. Bodykovtyń, «Ortalyq qalalyq klınıkalyq aýrýhana» MQK-nyń somatıka bóliminiń aǵa medbıkesi R. Omarovanyń, «№1 qalalyq perzenthana» MQK-nyń akýsher-gınekology P.Sadykovanyń, «Qazaq onkologııa jáne radıologııa ǵylymı-zertteý ınstıtýty» AQ bólim basshysy I.Hýsaınovanyń jáne basqalarynyń eńbekteri atalyp ótti.
Bulardan ózge, eriktiler, medısınalyq-kommýnaldyq mekemelerdiń qyzmetkerleri Qazaqstan Respýblıkasynyń jáne Memleket basshysynyń Qurmet gramotalarymen marapattaldy.
