Qostanaı oblysynda 60 emdeý mekemesi turǵyndarǵa tegin qyzmet kórsetedi. Bıyl óńirdiń Densaýlyq saqtaý salasyn qarjylandyrýǵa Covid-19-ǵa bólingen qarajatty eseptemegende, 56,5 mlrd teńge qarastyrylǵan. MÁMS esebinen 16,8 mlrd teńge baǵyttaldy.
«2020 jyly qarjylandyrý kólemi skrınıngter boıynsha 3 ese, joǵary tehnologııalyq medısınalyq qyzmetter sanatynda 12 ese, medısınalyq ońaltý boıynsha 27 ese ósti. KT jáne MRT júrgizýdi qarjylandyrý ótken jyldan 3,2 ese artyq. Qazirgi ýaqytta Qostanaı oblysynda 6 KT jáne 5 MRT apparaty bar. 2020 jyldyń qarasha aıynda Rýdnyı qalalyq kópsalaly aýrýhanasyna taǵy bir MRT apparaty jáne Qostanaı oblystyq aýrýhanasyna, Arqalyq óńirlik aýrýhanasyna, Rýdnyı qalalyq kópsalaly aýrýhanasyna jáne Jitiqara aýdandyq aýrýhanasyna 4 KT apparaty satyp alyndy. 2020 jyldyń 10 aıynda medısınalyq uıymdarǵa halyqqa medısınalyq qyzmet kórsetkeni úshin 40 mlrd 347 mln teńge tólendi. Shyǵyndardyń basym bóligi stasıonarda mamandandyrylǵan medısınalyq kómekti qamtamasyz etýge jumsaldy. Jalpy, táýliktik stasıonarlarda – 45147, kúndizgi stasıonarlarda 64620 pasıent, aýyl stasıonarlarynda 32153 adam em qabyldady», - deıdi Sáýle Aımuhambetova.
Qarjylandyrýdyń ósýi halyqqa medısınalyq qyzmet kórsetýdiń sapasyn arttyrýǵa múmkindik berdi. Máselen, qarajattyń kóbeıgeni aımaqta býyn aýystyrý operasııasyn jasaýǵa yqpal etti. Jyl basynan beri dál osyndaı ota oblystyń 180 turǵynyna jasaldy. Olardyń bári MÁMS júıesinde tirkelgen.
«Tize nemese jambas aýystyrý operasııasy mıllıon teńgeden asady, biraq saqtandyrylǵan pasıentter úshin bul tegin. 2019 jyly bizdiń oblysta 35 mln teńgege osyndaı 37 operasııa júrgizildi. Bıyl 180 adamǵa tegin ota jasalyp otyr. Osy jyly «Halyq densaýlyǵy jáne densaýlyq saqtaý júıesi týraly» Kodekske túzetýler engizildi. Nátıjesinde saqtandyrylmaǵan pasıentterge shuǵyl medısınalyq kómek kepildendirilgen pakette kórsetiletin boldy. Muny halyq túsinbeı, jeke emhanalarǵa júginip jatady», - dedi qor basshysy.
