Qazaqstan qarjygerler qaýymdastyǵy 2020 jyldyń on aıyna sarap jasaǵan. Qaýymdastyq deregi boıynsha, bıyl 10 aıda saqtandyrý kompanııalarynyń aktıvteri 21 paıyzǵa kóbeıgen. Sonyń ishinde ómirdi saqtandyrýshy kompanııalardyń úlesi 31 paıyzǵa artypty. Aktıvterdi ósirý boıynsha CK Nomad Life kósh bastaıdy eken. Atalǵan kompanııanyń 10 aıdaǵy tabysy 54 paıyzǵa nemese 71,8 mlrd teńgege ósken. Sektordyń 10 aıdaǵy taza tabysy – 105,7 mlrd teńge. Bul 2019 jyldyń dál osy kezeńimen salystyrǵanda 52 paıyzǵa kóp. Jalpy tabystyń 40 paıyzy «Evrazııa» SQ-ǵa tıesili bolyp shyqqan.
«2020 jyldyń 10 aıynda saqtandyrý kompanııalary 459,7 mlrd teńgege saqtandyrý syıaqylaryn jınady. Bul byltyrmen salystyrǵanda 10,5 paıyzǵa kóp. Saqtandyrý syıaqysyndaǵy ómirdi saqtandyrýshy kompanııalar úlesi 39,0 paıyzǵa deıin ósti (byltyr 37,7 paıyz bolǵan).
Saqtandyrý tólemderi 125,9 mlrd teńge boldy (byltyr 123,7 mlrd teńge bolǵan). Alaıda taza saqtandyrý syıaqysynyń somasy 81,6 mlrd-tan 78,5 mlrd teńgege deıin qysqardy. Sıfrlardaǵy bul aıyrmashylyq táýekelderdi qaıta saqtandyrýmen baılanysty.
Sektordyń qańtar-qazan aralyǵyndaǵy taza tabysy – 105,7 mlrd teńge. Byltyrǵy jalpy tabys 78,4 mlrd teńge bolǵan. Bıyl tabystyń eselep artýy – ınvestısııalyq bastamalardan mol tabys túsýimen baılanysty. 2020 jyly sektordyń saqtandyrýdan tapqan tabysy – 42 mlrd teńge bolsa, ınvestısııadan tapqan tabysy 46,2 mlrd teńge bolyp otyr» delingen qaýymdastyq málimdemesinde.
Bul rette sektor aktıvteriniń ortasha kiristiligi bıyl 7,9 paıyzǵa jaqsarǵan. Byltyr bul kórsetkish 6,3 paıyzdy kórsetip edi. Al kapıtaldyń ortasha kiristiligi (RoAE) 13,8 paıyzdan 17,5 paıyzǵa deıin ulǵaıǵan. Qaýymdastyq zertteýinshe, naryqtaǵy 28 kompanııanyń 27-si oń rentabeldilikke (tıimdilik) ıe eken.
