«Qoǵam ókilderi qorshaǵan ortaǵa áserdi baǵalaýdyń barlyq kezeńderine qatysady. Mindetti túrde birinshi sanattaǵy obektilerdiń qorshaǵan ortaǵa áseri baǵalanady. Al ekinshi sanattaǵy obektiler skrınıngten ótedi. Iаǵnı, qorshaǵan ortaǵa áserdi baǵalaýdy júrgizý qajet nemese qajet emes ekendigi anyqtalady. Úshinshi sanattaǵy obektiler boıynsha deklarasııa qabyldanady (qoımalar, jıhaz sehtary, beton óńdeý toraptary jáne qyzmeti jergilikti, qorshaǵan ortany lastaýdyń eleýsiz sıpatyndaǵy ózge de obektiler)», dedi mınıstr QR Ekologııalyq kodeksiniń jobasyn talqylaý kezinde.
Mınıstrdiń aıtýynsha, tórtinshi sanattaǵy obektiler retteýden tolyq bosatylǵan (avtojýý, TQO, qoǵamdyq tamaqtaný obektileri, qýattylyǵy az qazandyq qondyrǵylary bar mıkrobıznes obektileri).
«Qorshaǵan ortaǵa emıssııalar jáne tabıǵat qorǵaý is-sharalaryna bıýdjet qarajatynyń maqsatty jumsalýy úshin tólenetin tólem boıynsha kelesini aıta ketý qajet. Qazirgi ýaqytta qoldanystaǵy zańnama boıynsha tabıǵatty qorǵaý is-sharalaryna emıssııa úshin túsken tólemderdi maqsatty jumsaý mindettelmegen. Saldarynan jergilikti atqarýshy organdar kelip túsetin qarajattyń tek 45 paıyzyn ǵana qorshaǵan ortany qorǵaýǵa bóledi desek bolady. Keıbir oblystarda tabıǵat qorǵaý is-sharalaryna arnalǵan shyǵys 10 paıyzdan aspaıdy. Osyǵan baılanysty, zań jobasynda jergilikti atqarýshy organdar túsetin ekologııalyq tólemderdin esebinen 100 paıyz kóleminde qarjyny tabıǵat qorǵaý is-sharalaryna bólýge mindetti ekendigi kórsetilgen», dedi Myrzaǵalıev.
