Qazaqstan Halyq partııasynyń atynan Qazaqstan Respýblıkasy Parlamenti Májilisiniń depýtattyǵyna kandıdattar Jambyl Ahmetbekov pen Irına Smırnova Shyǵys Qazaqstan oblysynyń ortalyǵy О́skemen qalasyndaǵy Qarjy-ekonomıkalyq kolledjdiń ujymymen jáne oqýshylarymen kezdesý ótkizdi. Kezdesýde partııanyń baǵdarlamasynda qamtylǵan máseleler talqylandy ári kún tártibine jas otbasylardy qoljetimdi ıpotekamen qoldaý máselesi qoıyldy.
Spıkerlerdiń pikirinshe, qazir memleket jastardyń damyp, jetilýi úshin olardyń barlyq áleýmettik-turmystyq máselelerin sheship, turǵyn úımen qamtamasyz etýi kerek.
Irına Smırnova Qazaqstandaǵy jastardyń úlesi halyqtyń edáýir bóligin qurap otyrǵanyn aıtty.
– Sońǵy resmı málimetterge sáıkes, eldegi 15 pen 34 jas aralyǵyndaǵy jastardyń sany 5 mıllıonnan asady jáne osynshama mólsherde 14 jasqa deıingi balalar bar. Úkimettiń aldynda jas qazaqstandyqtarǵa bilim alýǵa, jumys ornyn tabýǵa jáne jeke turǵyn úı satyp alýǵa kómektesý mindeti tur, – dedi Irına Smırnova.
Tómengi palata depýtattyǵyna kandıdattar qazirgi jastardyń negizgi eki problemasy bar ekenin atap ótti. Olar – jumysqa ornalasý jáne jeke turǵyn úımen qamtamasyz etý.
– Biz azamattardyń barlyq sanaty úshin, onyń ishinde jastar men jas otbasylar úshin jyl saıyn jeńildetilgen turǵyn úı salýǵa zańnamalyq kepildik berilgen kvotalardy bekitý qajet dep sanaımyz. Qazaqstan Halyq partııasy elimizdiń barlyq muqtaj azamatyna laıyqty ómir súrý deńgeıin qamtamasyz etý úshin memleketimizdiń jetkilikti resýrstarǵa ıe ekendigine senimdi, – dedi Jambyl Ahmetbekov.
Kezdesý spıkerleri Qazaqstandaǵy qoldanystaǵy turǵyn úı baǵdarlamalary jastar úshin qoljetimsiz ekenin, olardy jastar men jas otbasylardyń paıdasyna qaraı ózgertý qajet ekenin eske saldy.
Buǵan qosa, Parlament Májilisiniń depýtattyǵyna Qazaqstan Halyq partııasynyń atynan kandıdattar Jambyl oblysyna bardy. Onda Tarazdaǵy 2019 jyldyń 27 aqpanynda jarylys bolǵan turǵyn úı turǵyndarymen kezdesý ótti.
Eske sala keteıik, atalǵan jarylystan úsh páter túgeldeı qırap, 4 adam qaıtys bolǵan. Úı turǵyndary ákimdik ókilderiniń páterlerdi qalpyna keltirýdi moınyna alǵanyn jetkizdi. Alaıda páterlerge júrgizilgen jóndeý jumystarynyń sapasy nashar.
Partııa ókilderi sonymen qatar Shymkent qalasyndaǵy apatty jaǵdaıda turǵan úıde boldy. Munda zeınetkerler men kóp balaly otbasylar turady.
Jalpy, Parlament Májilisiniń depýtattyǵyna Qazaqstan Halyq partııasynyń atynan kandıdattar saılaýaldy úgit-nasıhat jumystaryn belsendi júrgizýde.
