«О́ńirden barlyq mıneraldyq shıkizat túri anyqtalǵan desek bolady. Altyn, kúmis, mys, sınk, qorǵasyn, tıtan, barıt jáne jer asty sýlarynyń úlken qory Shyǵys Qazaqstanda shoǵyrlanǵan. Sondyqtan geologııalyq barlaý tereńdigin ulǵaıtýymyz qajet. Bul baǵytta zamanaýı tehnologııa ádisterin qoldaný mańyzdy. Investorlarǵa qolaıly jaǵdaı jasaý arqyly úlken nátıjelerge qol jetkizýge bolady. Jastardy geologııa salasyna tartyp, baýlý da asa mańyzdy. «Qazgeologııa» kompanııasyna Shyǵys Qazaqstannyń jergilikti joǵary oqý oryndarymen jumysty kúsheıtýdi tapsyramyn», dedi Maǵzum Myrzaǵalıev jıynda.
Oblys ákimi Danıal Ahmetov óńirde mıneraldyq shıkizat qorynyń taýsylýǵa jaqyn ekenine nazar aýdardy.
«Geologııalyq barlaý óńirdiń metallýrgııa salasynyń tek jaqyn ýaqyttaǵy ǵana emes, aldaǵy 10-15 jyldaǵy keleshegin anyqtaıdy. Qala quraýshy eldi mekenderdegi kásiporyndar tek jumysshylarǵa emes, turǵyndarǵa da áleýmettik qoldaý kórsetedi. Sondyqtan óńirdiń áleýmettik-ekonomıkalyq jaǵdaıyna tikeleı áser etetin bul baǵyttaǵy sharalarǵa ákimdik múddeli», dedi Danıal Ahmetov.
Ekologııa mınıstriniń orynbasary Serikqalı Brekeshov óńirdiń negizgi áleýmettik-ekonomıkalyq damýynyń draıveri taý-ken óndirisi ónerkásibi ekenin, bul salaǵa bólinetin qarjy kólemin arttyrý qajettigin atap ótti.
«Ekologııa, geologııa jáne tabıǵı resýrstar mınıstrliginiń derekteri boıynsha Shyǵys Qazaqstan oblysy boıynsha memlekettik balansta 39 mys, 30 qorǵasyn, 34 myrysh, 122 altyn, 48 kúmis, 11 – qalaıy ken oryndary tirkelgen. Oblystyń jer qoınaýyn paıdalanýǵa 2011-2019 jyldar aralyǵynda shamamen 2,7 trln teńge jeke ınvestısııa tartyldy, onyń ishinde geologııalyq barlaý jumystaryn júrgizýge tikeleı 71,4 mlrd. teńge baǵyttaldy, bul jalpy qarjylyq shyǵyndardyń 3 %-ynan aspaıdy», dedi ol jıyn barysynda.
«Kazakhmys Barlau» JShS Bas dırektory qazir Ǵalym Nurjanov kompanııa Shyǵys Qazaqstan oblysy aýmaǵynda 3 perspektıvaly joba daıyndap jatqanyn málimdedi.
«Onyń biri buryn tómen quramdy ken ornyna jatqyzylǵan «Aıdarly» jobasy. Bul - qazba jumystary júrgizilmeı jatqan álemdegi eń iri ken oryndarynyń biri. Alaıda búginde metall baǵasynyń ózgerýine baılanysty atalǵan nysannyń tartymdylyǵy artty. Sondyqtan bıyl tolyqmasshtabta burǵylaý jumysy bastaldy. Oǵan 1 mlrd teńge bólindi. Aldyn ala boljam boıynsha «Aıdarlyda» 4,3 mlrd tonna rýdy qory nemese 15 mln tonna mys bar», dedi Ǵ. Nurjanov.
Atap ótý kerek, kompanııa qyzmetkerleriniń 35%-y Shyǵys Qazaqstandaǵy JOO-lardyń túlekteri.
Aıta keteıik, Ekologııa, geologııa jáne tabıǵı resýrstar mınıstrligi geologııalyq barlaýdyń bes jyldyq kezeńge arnalǵan memlekettik baǵdarlamasyn ázirlegen. Onyń aıasynda ShQO-daǵy jáne monoqalalardaǵy jumystarǵa erekshe mán beriledi. ShQO sheginde eki júz myń aýqymdy óńirlik jumystar júrgizý kózdelgen, onyń ishinde 27.9 myń sharshy km alańǵa geologııalyq-mıneragendik kartaǵa túsirý, 6.8 myń sharshy km aýmaq alańdaryn geologııalyq jete zertteý jáne 27.2 myń sharshy km alańǵa tereń geologııalyq kartaǵa túsirý jumystaryn aıtýǵa bolady.
Qara-aıaq, Mýncha ýchaskelerinde sırek metaldarǵa izdestirý jumystary júrgiziledi, sondaı-aq basqa ýchaskelerde negizgi paıdaly qazbalar (altyn, mys, polımetaldar) zerdelenedi.
Jıyn qorytyndysynda oblystyq ákimdikpen barlaýdy kúsheıtý, qosymsha qarjy tartý máselesi boıynsha Jumys tobyn qurý kelisildi. Onyń quramyna saladaǵy ǵalymdar, kompanııalar men múddeli memlekettik organdar ókilderi kiredi.
