Jyl basynda Qyzylorda qalasynyń bıýdjeti 68,9 mlrd teńge bolyp bekitilse, jyl qorytyndysymen bul kórsetkish 95 mlrd teńgege jetken. Qarqyndy qurylys alańyna aınalǵan Syrdyń bas shaharynda bıyl 1 500-ge jýyq otbasy baspanaly bolyp, qonys toıyn toılapty. Qalada taǵy 2 myń 380 páterlik 52 kópqabatty turǵyn úı salynyp jatyr. Osy jyly oblys ortalyǵynda respýblıkalyq, jergilikti bıýdjetten bólingen qarjy esebinen 408 kóshege ortasha jáne kúrdeli jóndeý jumystary júrgizildi.
Jyl qorytyndysynda shahar basshysy qala ekonomıkasyna óreli ózgerister ákelip, órisin keńeıtken memlekettik baǵdarlamalar aıasynda atqarylǵan jumystardy da tarqatty.
Máselen «Jumyspen qamtý jol kartasy» memlekettik baǵdarlamasyna saı qala bıýdjetine bólingen qarajattar shahardaǵy ózekti máselelerdi sheshýge baǵyttalyp, birneshe mádenıet, bilim nysandary kúrdeli jóndeýden ótkizilgen. «Taǵzym» memorıaly, "Syr Ana" monýmenti, «Temir jol» parki, Nazarbaev dańǵyly abattandyryldy. «Aýyl - el besigi» arnaıy jobasy arqyly Aqsýat aýyldyq okrýgindegi №143 mektep kúrdeli jóndeýden ótip, eldimekendegi 16 kóshege jóndeý jumystary júrgizildi.
Saltanatty sharada sondaı-aq jyldaǵy dástúrge saı el damýy jolynda eseli eńbegimen erekshelengen, qalanyń qoǵamdyq-saıası ómiriniń ósip-órkendeýine úles qosyp, ár salada tabysty eńbek etip júrgen jyl úzdikteri marapattaldy.
Budan bólek jyl qorytyndysymen «Jyldyń úzdik ustazy» nomınasııasyn ıelengen pedagogtar da marapat bıiginen kórinip, qarjylaı syıaqyǵa ıe boldy.
