Sonymen qatar saltanatty sharaǵa Mádenıet jáne sport vıse-mınıstri Nurǵısa Dáýeshov, aqyn, Qazaqstannyń eńbek sińirgen qaıratkeri Júrsin Erman, ánshi, kompozıtor Qazaqstannyń halyq ártisi Altynbek Qorazbaev, halyqaralyq «Alash» syılyǵynyń ıegeri, «Jalyn» jýrnalynyń bas redaktory Ǵalym Jaılybaı jáne aıtysker aqyn Baýyrjan Halıolla qatysty.
Nurǵısa Dáýeshov Mádenıet jáne sport mınıstri Aqtoty Raıymqulovanyń lebizin jetkizse, Júrsin Erman, Altynbek Qorazbaev, Ǵalym Jaılybaı talaı dodada top jarǵan daryndy ulǵa jerlesteri kórsetken qurmetke rızalyq tanytty. Osy syılyqty úshinshi márte ıelenip, Syrdyń mereıin ósirgen Muhtar Nııazov qolyna tıgen «Altyn dombyrany» óńir rýhanııatyna kórsetken qoldaýyna alǵys aıta otyryp aımaq basshysyna tabystady.
Gúlshara Ábdiqalyqova «Altyn dombyranyń» Syr jurty úshin erekshe maqtanysh ekenin jetkizdi.
- Baıyrǵy babalardyń izindeı, qazaqtyń aıtys óneriniń bar qudiretin boıyna sińirgen Muhtar – elimizge tanymal daryndarymyzdyń biri. Osy «Altyn dombyra» respýblıkalyq aıtysy bastalǵan 2012 jylǵy alǵashqy «Altyn dombyra» ıegeri atanyp, qýantyp edi. Odan keıin de eki márte osy aıtysta top jaryp, Syr jurtyna úlken syı jasady, - dedi oblys ákimi.
Oblys basshysy atyna óńirimizdiń bıznes qaýymdastyǵynyń ókilderi, aǵaıyndy Murat, Marat Sársenbaevtardyń aıtys aqtańgerine avtokólik mingizý jaıly usynys bildirgenin atap ótip, kásipker azamattarǵa Syr jurtshylyǵy atynan alǵys aıtty. Muhtar Nııazovqa eń sońǵy úlgidegi «Toyota Camri 70» avtokóliginiń kiltin tartý etti.
Syrǵa jetken «Altyn dombyra» oblystyq tarıhı-ólketaný mýzeıiniń «Mádenıet jáne óner» zalyna qoıyldy.
