Fılıal basshysy Eltaı Taıalıev pen trassalarǵa baryp tekserý kezinde alynatyn jol materıaldarynyń sapasyn zerthanada taldaıtyn mamandar 9-11 synyp oqýshylaryn qyzyqtyrǵan saýaldarǵa túsinik berdi.
«Búgin oqýshy – erteńgi jas túlekterdiń jolshy mamandyǵyna qyzyǵýshylyǵy basym ekendigi qýantady. Onlaın-kezdesý barysynda zerthana ishin kórsetip, mundaǵy jumystardyń qalaı jasalyp jatqanyn balalarǵa túsinikti tilmen aıtyp jetkizdik dep oılaımyn. Bul mamandyqty ul-qyz birdeı ıgere alady. Myna indetten qutylyp, karantındik shekteýler alynǵan soń Aqtaýdaǵy mekeme ǵımaratyn aralatyp, mundaǵy qural-jabdyqtarmen qalaı jumys isteý kerektigin kórsetýdi de josparlap qoıdyq», deıdi Taıalıev.
Bıyl jyl basynda «Jol aktıvteriniń ulttyq sapa ortalyǵy» respýblıkalyq memlekettik kásiporny basshylyǵy «1000 mektep» bastamasyn júzege asyrýdy qolǵa aldy. Maqsat – mektep bitirýshi túlektermen kezdesip, jolshy mamandyǵyna tartý.
Mańǵystaý oblysynda 154 mektep bar desek, aımaqta karantındik shekteý sharalary engizilgen ýaqytqa deıin 26 orta bilim berý mekemesi qamtyldy. Bul rette jol sapasyn baqylaýshylar Aqtaýdan bólek Munaıly men Túpqaraǵan aýdanyndaǵy mektepterge arnaıy baryp, jas býyn ókilderimen júzdesti.
Atalǵan kezdesýlerde oblys kóleminde salynyp jáne jóndelip jatqan kólik joldarynyń sapasyn baqylaý jumystarynyń nátıjeleri tanystyrylyp, jol mamandyqtary jaıly jan-jaqty aqparat aıtyldy.
Kóp jaǵdaıda oqýshylardy mektep bitirgen soń qandaı oqý ornyna túsýge bolatyndyǵy alańdatady. Aıta keteıik, Qazaqstanda jol salasy boıynsha mamandardy daıarlaýmen 30-jýyq ýnıversıtet pen 50-ge tarta kolledj aınalysady.
