Onyń aıtýynsha, salymshylar men alýshylardyń óz jınaǵyna qyzyǵýshylyǵy artty. Osy oraıda jeke zeınetaqy shotynan úzindi-kóshirme alýǵa suranys sany kóbeıgen. Iаǵnı, qabyldanǵan zańnamalyq ózgeristerdiń jaǵymdy jaǵynyń biri – zeınetaqy alýǵa da, aǵymdaǵy qajettilikke de paıdalanýǵa múmkindik beretin zeınetaqy jınaǵyna degen qyzyǵýshylyqty arttyrý. Zeınetaqy jınaǵyn paıdalaný úshin olardy qalyptastyrý qajet.
Al ol úshin eńbek etken ýaqyt ishinde zeınetaqy jarnalary turaqty jáne tolyq kólemde aýdarylyp otyrǵany jón. Osylaısha, salymshylardyń quqyǵy keńeıtilip, olardyń óz jınaǵyn qalyptastyrýǵa degen qyzyǵýshylyǵyn, eńbek tabysynyń ashyqtyǵyn, basqarýdyń tıimdiligin arttyrýy tıis tetikter iske qosyldy.
2020 jylǵy 1 jeltoqsandaǵy jaǵdaı boıynsha mynadaı sandardy keltirýge bolady: 761 myńnan astam adam merziminen buryn paıdalaný quqyǵyn qoldana alady, olardyń shottarynda 2,4 trln teńgeden astam qarajat bar.
«Zeınetaqy jınaqtarynyń bir bóligin paıdalaný quqyǵyn iske asyrý úshin azamattar, eń aldymen, óz jınaǵyn tekserip, jetkiliktilik sheginen asatyn qajetti somanyń bar ekenine kóz jetkizýi tıis. BJZQ Qordyń saıty nemese uıaly qosymshasy arqyly úzindi-kóshirme alýdyń qoljetimdi jáne jedel tásilderin usynady. Zeınetaqy shotynyń jaı-kúıin egov.kz portaly arqyly da tekserýge bolady. Zeınetaqy jınaqtaryn alý týraly sheshim qabyldaǵan adamdar turǵyn úı satyp alý jáne emdelý máseleleri jónindegi ýákiletti operatorǵa (Otbasy bank) júgine alady. Ýákiletti operatordan habarlama alǵannan keıin BJZQ zeınetaqy jınaqtaryn ýákiletti operatordyń arnaıy shottaryna salý úshin aýdarýdy júzege asyrady», dedi J.Qurmanov.
Onyń sózine qaraǵanda, salymshy zeınetaqy jınaǵyn maqsatty qajettilikterge alǵan kezde jeke tabys salyǵyn tóleý tásilin tańdaý quqyǵyna ıe bolady (jarnalar aýdarylǵan kezde JTS alynbaǵanyn eskertemiz).
Iаǵnı azamattar JTS tóleýdi keıinge qaldyrýdy tańdasa bolady nemese turǵyn úı jaǵdaıyn jaqsartý jáne emdelýge aqy tóleýge arnalǵan jınaqtaryn alǵan kezinde JTS-ty tolyq kólemde óteı alady. Eske sala keteıik, Parlament zeınetaqy jınaǵynyń bir bóligin alǵan kezde tabys salyǵyna qatysty túzetýlerdi qabyldady.
