Shalǵaıdaǵy «Zolotaıa nıva» seriktestigi aqyq dán ósirip, aqtyly mal baǵyp otyrǵan ozat sharýashylyqtardyń sanatynda. Búginde mańdaı termen ósirgen astyǵy men mal ónimderin óńdep, tolyq klasterlik júıege kóship, tabystaryn eseleı túsip otyr.
Jańa zamannyń talabyna tolyq jaýap beretin mal bazy eki jyl buryn salynǵan eken. Bári ret-retimen. Aıtalyq, jelindegen sıyrlar bir bólek, buzaý-torpaǵy bólek baǵylady. Jalǵyz maldyń ǵana emes, malshynyń da jaǵdaıy qapysyz eskerilgen. Olardyń jumystan bos ýaqytynda tynyǵýyna, túski as ishýine barlyq jaǵdaı jasalǵan.
Sharýashylyqtyń 600 bastan astam angýs sıyry bar. Mamandardyń aıtýyna qaraǵanda, shyǵyny mol qara mal baqqan soń qaýmeti jetip jatsa, ónimi mol asyl tuqymdy baqqan durys. Biraq bul arada eskere ketetin bir jaıt, kúı talǵaıtyn asyl tuqymnyń ǵylymı negizben saraptalǵan azyq-túligi qamdalýy qajet. Sharýashylyq basshylary bul talapty múltiksiz oryndap keledi. Mal azyǵyn baıytyp berýge múmkindik jetip jatyr. Bıyl aýa raıy onshalyqty qolaıly bolmasa da, bir jarym jylǵa erkin jetetin jem-shóp qoryn daıyndap alypty.
– Qulazyp jatqan qý dala edi, – deıdi seriktestik dırektorynyń orynbasary Sergeı Dmıtrıchenko, – áýeli jaqsylap turyp eki baz salyp aldyq. Bir jarym myń tonna mal azyǵy syıatyn qoımany da daıyndadyq. Eń bastysy – adamdar turaqty tabys tabatyn jumys kózi bar. Qazir mal sharýashylyǵymen onnan astam adam shuǵyldanady. Jalaqylaryn ýaqtyly alyp otyr.
Sapaly etke suranys joǵary. Sharýashylyq mal ónimderin taza et kúıinde ǵana satpaı, birneshe túrli ónim daıyndaıdy. Shıkizaty sapaly bolǵandyqtan, ónimderi de ótimdi. О́ıtkeni, eshbir qospasy joq, tabıǵı taza. Jergilikti turǵyndardy joǵary surypty un men nan-toqash ónimderimen de qamtamasyz etýde. Nátıjesinde, taǵy da jańa jumys oryndary ashylǵan. Sharýashylyqtyń naýbaıhanasynda dámi til úıiretin nan ónimderiniń onnan astam túri daıyndalady. Nan satatyn dúkenderindegi ár bólke nannyń baǵasy – 75 teńgeden. Sondaı-aq bul jerden jartylaı fabrıkattardy da, tartylǵan etti de arzan baǵamen satyp alýǵa bolady.
Igiligin el kórip otyrǵan klasterlik júıe sharýashylyqqa da tıimdi. Ońqaı asyqtaı úıirilip turǵan sharýanyń aýqymyn keńeıtýdi oılastyrǵan sharýashylyq basshylary aldaǵy ýaqytta ónim túrlerin eseleı túspek. Saıyp kelgende eresen eńbekpen egin egip, mal ósirgen sharýashylyqtar ónimderin shıkizat kúıinde emes, óńdep ótkizse, isi órge basatyndyǵyn naqty isimen dáleldep otyrǵan osy bir qadamnyń búgingi tynysy ózgege ónege.
Aqmola oblysy,
Jaqsy aýdany
