Prezıdent Vladımır Pýtınmen áńgime barysynda taraptar Qazaqstan men Reseı arasyndaǵy barlyq baǵyttar boıynsha ekijaqty qarym-qatynastardyń damýy oń dınamıkada, strategııalyq áriptestik jáne odaqtastyq sıpatynda órbip kele jatqanyn atap ótti.
Qazaqstan men Reseı COVID-19 indetiniń zardaptaryn eńserý, kópjaqty qurylymdar aıasyndaǵy jumystardy úılestirý boıynsha ózara tıimdi yntymaqtasty odan ári nyǵaıtýǵa beıildi ekenderin naqtylady. Vladımır Pýtın baýyrlas Qazaqstan halqyna jańajyldyq quttyqtaýy men izgi tilegin jetkizýdi surady.
О́zbekstan Prezıdenti Shavkat Mırzııoevpen suhbat kezinde berik baýyrlastyqqa jáne tatý kórshilikke negizdelgen qazaq-ózbek seriktestigin tereńdetý isine oń baǵa berildi.
Memleket basshylary bıylǵy jyldyń qorytyndylaryn joǵary baǵalap, saıası, saýda-ekonomıkalyq jáne mádenı-gýmanıtarlyq baılanystardy keńeıtý úshin kúsh biriktirýdiń, sondaı-aq, Ortalyq Azııadaǵy aımaqtyq ujymdasýdyń mańyzdylyǵyn aıtty. Qasym-Jomart Toqaev pen Shavkat Mırzııoev bir-birin Jańa jylmen quttyqtap, júrekjardy tilekterin aıtty.
Tájikstan Prezıdenti Emomalı Rahmonmen áńgime barysynda Qazaqstan Prezıdenti damýdyń joǵary qarqynyn kórsetip otyrǵan memleketaralyq yntymaqtastyqtyń qazirgi jaǵdaıyn oń baǵalady. Tájikstan Prezıdenti eki eldiń halyqaralyq arenada odaqtas jáne barlyq baǵyttar boıynsha ekijaqty yntymaqtastyqty nyǵaıtýǵa múddeli ekenin atap ótti. Memleket basshylary bir-birin Jańa jylmen quttyqtady.
