Jańa jylǵa – jańartylǵan vokzal

Halyq arasynda «akvarıým» degen ataq alǵan shynydan qaptalǵan eski vokzaldyń syrtqy sáni kelisti bolǵanymen ishi jolaýshylarǵa tym qolaısyz edi. Odan ekinshi, úshinshi jáne tórtinshi temir jol perrondaryna shyǵý úshin vokzaldyń ishimen úsh qabatty úıdiń bıiktigine kó­te­rilýge týra keletin. Vokzaldyń eki qanatyndaǵy basqyshtardyń tar­lyǵy sondaı, onda qarsy jolyqqan eki adam júkterimen zorǵa syıysyp ótetin. Bul «qap tasıtyn» qıyn zamannyń ýaqytynda jolaýshylarǵa tipti qıyn tıdi. Sharshap, shaldyqqan halyqtyń ashy daýystary da jıi shyǵyp jatatyn. Al perrondarǵa túsý úshin joǵarydan temir baspaldaqtarmen quldılaýǵa týra keletin. Qystyń qatty aıazdarynda temir taǵandarǵa muz qatyp, olar barynsha taıǵanaq bolatyn edi. Odan taıyp, talaı adam jaraqat ta alǵan.

Endi sonyń bári artta qalyp, Qyzyljarda múlde jańa vokzal ashylyp otyr. Ondaǵy kútý zalyndaǵy oryndar burynǵy 300-den eki ese artyp, 600-ge deıin arttyrylǵan. Zaldyń ózi de burynǵydan 800 sharshy metrge keńeıtilgen. Jolaýshylardyń júkterimen joǵary kóterilýine yńǵaıly bolý úshin lıftiler men eskalatorlar ornatylǵan.

Vokzaldy qaıta jaraqtaý mindetin Reseıdiń Temir jol kompanııasy (RJD) óz mindetine alǵan. О́ıtkeni, bul jerdegi temir jol 1992 jylǵy ekijaqty kelisim boıynsha Reseı Federasııasynyń menshigine berilgen. Sondyqtan «Petropavlovsk stansasy» dep atalatyn vokzal da solardyń menshiginde.

Osy vokzaldy qaıta jaraqtaýǵa Qazaqstannyń jergilikti bıligi osydan úsh jyl buryn RJD kompanııasymen kelissózder júrgizgen edi. Sodan beri kompanııa qurylys jumystaryn júrgizip, vokzaldy qaıtadan jaraqtap shyqty. Al Qazaqstan tarapy vokzaldyń aldyn qaıta jańǵyrtyp, kelgen qonaqtar kóz almaıtyndaı ǵajap sáýlet jasady.

Mine, jańa dep aıtýǵa tolyq negizi bar vokzal ǵımaratynyń ashylý saltanatyna oblys ákimi Qumar Aqsaqalov qatysty. Al Reseı tarapynan RJD ókili, Ońtústik-Oral temir jol (OOTJ) basqarmasynyń bastyǵy Anatolıı Hramsov boldy. О́z sózinde oblys ákimi Q.Aqsaqalov: «Reseı men Qazaqstan arasyndaǵy tyǵyz yntymaqtastyq arqyly «Reseı temirjoldary» kompanııasy aýqymdy qaıta qurýdy júzege asyrdy. Búgin birlesken jumysymyzdyń jemisin kórip otyrmyz. Bul vokzaldyń 1966 jyly salynǵannan bergi jarty ǵasyrdaǵy alǵashqy túbegeıli qaıta jóndelýi. Eski vokzaldan tek qabyrǵalar ǵana qaldy. Jańǵyrtylý barysynda barynsha jetildirilgen tehnologııa­lar qoldanyldy. Endi úlken sómkelermen baspaldaqpen kó­terilýdiń qajeti joq. Qazir bizdiń elimizdegi eń kóne vok­zal­dardyń biri eń ádemisine aınaldy. Qazaqstandaǵy eń ádemi temir jol vokzaldarynyń biri bizde ornalasqanyna bárimiz de qýanyshtymyz», dedi.

Vokzaldy jańǵyrtýǵa OOTJ 3 mlrd teńgedeı qarajat quıdy. Onda jolaýshylarǵa barlyq jaǵdaı jasal­ǵan. Zamanaýı saqtaý kameralary men elektron­dy kezek te ornatylǵan. Sóı­tip jańa, 2021 jyl soltús­tik­qazaq­standyqtar úshin jańa vokzalmen bastaldy.

Soltústik Qazaqstan oblysy