«Táýelsizdigimizdiń mereıtoıy aıasynda osyndaı birtýar tulǵalardy eske alyp, olardyń murasyn jastarymyzǵa jáne búkil álemge pash etýimiz kerek. Sonymen birge, osy taqyrypty zerttep júrgen ǵalymdar men jazýshylardyń da eńbegi qoldaýǵa ıe bolýy jáne baǵalanýy qajet. Alash arystarynyń asyl murasyn ıgerý jalǵasa berýge tıis. Mıllıondaǵan adamdy qazaǵa ushyratyp, tiri qalǵanyn jan saýǵalap bosyp ketýge májbúr etken alapat asharshylyqtyń alǵashqy kezeńi – 1921-1922 jyldardaǵy náýbetten beri 100 jyl ótti. Sol zulmattyń kesirinen qyrylyp qalmaǵanda, halqymyzdyń sany qazirgiden áldeneshe ese kóp bolar edi», - deıdi Memleket basshysy.
Osy tusta el Prezıdenti tarıhymyzdyń bul aqtańdaq betteri áli kúnge deıin jan-jaqty zerttelmeı kele jatqanyn jáne ǵalymdardyń arasynda asharshylyq qurbandarynyń naqty sany týraly ortaq paıym da joq ekenin basa aıtty.
«Ala-qula derekter jáne onyń sebep-saldary jaıly ártúrli kózqarastar qoǵamdy adastyrady. Tıisti tarıhı qujattardy, jınalǵan málimetterdi asa muqııat zerdeleý kerek. Bilikti mamandar júıeli zertteýmen aınalysyp, soǵan sáıkes asharshylyq máselesine memleket tarapynan baǵa berilgeni jón. Biz bul kúrdeli máselege ustamdylyqpen jáne jaýapkershilikpen qaraýymyz qajet. Jalpy, tarıhı zertteýlerdi uranshyldyq pen dańǵazasyz, taza ǵylymı ustanymmen júrgizgen durys», - deıdi Prezıdent.
Bıyl áıgili Jeltoqsan oqıǵasyna 35 jyl tolady. 1986 jyly órimdeı ul-qyzdarymyz Keńes Odaǵynyń qaharynan qaımyqpaı, ult namysy úshin alańǵa shyqty. Osy kúnnen soń týra bes jyl ótkende Táýelsizdigimizdi jarııalaýymyzdyń sımvoldyq máni zor.
Osyǵan oraı Qazaqstan Prezıdenti azattyqtyń alǵashqy qarlyǵashtary – Jeltoqsan qaharmandarynyń azamattyq erligi laıyqty baǵasyn alyp, josparly túrde nasıhattalýy kerektigin basty nazarǵa qoıady.
«Biz jyl sońyna deıin jańa tarıhymyzdaǵy birneshe aıtýly oqıǵanyń mereıli belesin atap ótemiz. 1991 jyly Semeı polıgony jabyldy. Onyń elimiz ǵana emes, barsha adamzattyń bolashaǵy úshin aıryqsha mańyzdy sheshim ekenin eskerip, arnaıy is-shara ótkizý qajet dep sanaımyn. Elbasy qol qoıǵan Jarlyqtyń arqasynda Qazaqstan búkil dúnıe júzine ıadrolyq qarý-jaraqqa qarsy álemdik qozǵalystyń kóshbasshysy bolyp tanyldy, alyp memleketterdiń senimine ıe boldy, halyqaralyq qoǵamdastyqta jaýapkershiligi joǵary el retinde moıyndaldy», - deıdi Memleket basshysy.
