Bıotehnııalyq dep otyrǵanymyz, jabaıy janýarlardyń qystan qysylmaı aman shyǵýy úshin jasalatyn sharalardyń bir túri. Tuıaqtynyń izi baıqalǵan tustaǵy naýalarǵa bıdaıyn, tuzyn salady, aǵashtyń búrin býyp iledi. Al naýalardy ınspektorlar jaz maýsymynda ázirlep, ornatyp qoıady.
– «Jaz kıerińdi qys saıla, qys minerińdi jaz saıla» degendeı, memlekettik ınspektorlar bıotehnııalyq sharalarǵa kúzden bastap kirisedi. Olar bekitilgen aýmaqtaryndaǵy naýaǵa jem salyp, shóp baılaıdy. Onyń iske asyrylýyn ǵylymı qyzmetkerler men ańshy bıolog mamandar qadaǵalaıdy, – deıdi «Tarbaǵataı» memlekettik ulttyq tabıǵı parkiniń Ǵylym, aqparat jáne ekologııalyq monıtorıng bóliminiń basshysy Jańylqan Qabıqyzy.
Tarbaǵataı taýlary – ań-qusy shýlap jatqan óńir. Arqary da, taýtekesi de bar. Jyrtqyshtyń da túr-túri jortady. Mamandardyń aıtýynsha, qoryq qurylǵannan beri ań-qustardyń sany anaǵurlym artyp kele jatqan kórinedi. Árıne, ań aýlaýǵa shekteý qoıylyp, qorǵaýǵa alynǵan soń jyl saıyn arta túsýi zańdylyq. Jýyqta quryp qoıǵan fototuzaqtarǵa qasqyr da, qaban da túsip qalǵan. Jazǵa salym Malaq aýylynyń mańynan aqqýlardyń qıqýy estiledi. Kúzdiń kúni ań-qustary kóship-qonyp jatatyndyqtan, sanaq naqty bola qoımaıtyn kórinedi. Al qysqy sanaqqa mamandar endi kirisedi.
Shyǵys Qazaqstan oblysy,
Úrjar aýdany
