Almaty qalasy Qoǵamdyq densaýlyq saqtaý basqarmasynyń málimetinshe, 5 qańtardaǵy jaǵdaı mynadaı: 665 adam stasıonarlyq em qabyldap jatyr, onyń ishinde 30 bala bar. Onyń ishinde 548 naýqastyń jaǵdaıy ortasha, 100 adam aýyr jáne 17 adam óte aýyr jaǵdaıda. Jan saqtaý bóliminde 60 naýqas bar, 9 adam – О́JJ apparatynda jatyr. Búginde tósek qorynyń 67,6% -y bos. Esterińizge sala keteıik, stasıonarlardyń jalpy qýaty – 7 011 tósek-oryn.
Sońǵy 10 kúnde qalada koronavırýstyń jańa sımptomsyz jaǵdaılaryn tirkeýdiń ósý dınamıkasy jańa jaǵdaılardyń kúndelikti tirkelýin kórsetedi. О́tken táýlikte 34 adam baqylaýǵa alyndy. О́sim 0,3% qurady.
Almaty qalasy Qoǵamdyq densaýlyq saqtaý basqarmasynyń shtattan tys bas ınfeksıonısti, «I.Jekenova atyndaǵy qalalyq klınıkalyq juqpaly aýrýlar aýrýhanasy» ShJQ MKK dáriger-sarapshysy Tamara Ýtaganova megapolıstegi syrqattanýshylyq jaǵdaıyna túsinikteme berdi.
«Uzaq demalystan keıin, ádette, JRVI jáne tumaý aýrýynyń statıstıkasy artady. Vırýstyq ınfeksııanyń ınkýbasııalyq kezeńi – 2 apta. Táýelsizdik merekesinen keıin, jańa jylǵa deıin 14 kún ótti. Sonymen qatar, KVI-men aýyrǵandar sanynyń ósýi maýsymdyq jaǵdaılarmen de baılanysty, qazir JRVI men tumaýǵa shaldyǵýdyń sany ósken kez, sýyq tıip, tumaý juqtyrǵandardyń kóbeıýi aýa-raıyna baılanysty, qazir Almatyda qatty aıaz tur», deıdi Tamara Ýtaganova.
Tamara Ýtaganova emdeý algorıtmin saqtaýdyń jáne ózin-ózi emdeýmen aınalyspaýdyń mańyzdylyǵyn erekshe atap ótti jáne negizgi usynystarmen bólisti.
«Aýrý belgileri paıda bolǵan kezde – dene qyzýynyń kóterilýi, murynnyń bitelýi, tamaqtyń aýyrýy, úı karantınin saqtap, turǵylyqty jeri boıynsha emhanaǵa medısınalyq kómekke júginý qajet. Dene qyzýy joǵarylap, qatty bas aýrýy mazalap, júrek aıný jáne qusý, entigý paıda bolǵan kezde jedel járdem shaqyrý kerek. Eshbir jaǵdaıda óz-ózin emdeýmen aınalysýǵa bolmaıdy», deıdi dáriger-sarapshy.
Buǵan deıin Tamara Ýtaganova medısınalyq betpeni durys taǵý men olardy jıi aýystyryp turý kerektigin, sonymen birge, olardy joıý erejelerin saqtaý kerektigin atap ótken bolatyn.
Búgingi tańda koronavırýsty juqtyrý qaýpi joǵary. Osyǵan baılanysty Almaty ákimdigi qala turǵyndary men qonaqtaryn barlyq saqtyq sharalaryn saqtaýǵa shaqyrady. Áleýmettik qashyqtyqty saqtaýǵa beı-jaı qaramaı, betperde kııý jáne múmkindiginshe adamdar kóp jınalatyn jerlerge barýdan aýlaq bolýy kerek, bul ásirese 65 jastan asqan adamdarǵa qatysty.
