Bıyl Qostanaı oblysynda jalpy quny 11,5 mln teńge bolatyn 69 sıfrly joba júzege asyryldy. Máselen, «Baıan sulý» fabrıkasynda vafeldi kámpıtter men shokoladty batondar shyǵaratyn avtomattandyrylǵan óndiristik jeli iske qosyldy. Al «Jas Qanat 2006» qus fabrıkasy jem daıyndaıtyn jáne jumyrtqa tasıtyn qurylǵylaryn jańǵyrtty.
Aqparattandyrý basqarmasy basshysynyń aıtýynsha, aımaqta sozylyp bara jatqan pandemııaǵa baılanysty shaǵyn jáne orta bıznestiń de elektrondy saýdaǵa júginýi jıilegen.
«Oblystyq ákimdik qazir fýlfılment ortalyǵyn iske qosýdy qarastyryp jatyr. Bul ortalyq iske qosylsa, poshtalyq jóneltilimderdiń kólemi artyp, taýarlardy jetkizý merzimi qysqarady. Bıyl «Qazposhtanyń» oblystyq fılıaly franchaızıng núkteleriniń esebinen 25 qosymsha bólimshe ashty. Elektrondy saýdany damytý boıynsha onlaın baqylaý-kassalyq mashınalaryn engizý jumystary júrip jatyr. Búginde 35 myń kassalyq mashına onlaın rejimde jumys isteıdi», dedi oblystyq aqparattandyrý, memlekettik qyzmet kórsetý jáne arhıv basqarmasynyń basshysy Azamat Qashıev.
Munyń syrtynda, búginde Qostanaı oblysynda vırtýaldy túrde jumys istep jatqan 167 bıznes nysany tirkelgen.
Qostanaı oblysy
