«Táýelsizdik bárinen qymbat» atty maqalasynda Prezıdentimiz osy týraly aıtty. Jalpy, menińshe, bul maqalany asa jaýapty kezeńdegi elimizdiń negizgi ıdeologııalyq baǵyttaryn kórsetetin qujat dep ataýǵa bolady.
Birtutas ult bolý ońaı emes. Az emespiz, kóppiz. Túrli pikir-kózqarastarymyz da bar. Ońtústik-soltústik, naǵyz-shala, koreı-uıǵyr, qazaqtildi-orystildi degen toptarǵa bólinbeýmiz qajet. Sondyqtan bizdi biriktiretin myqty uǵymdar bolýy kerek. Prezıdentimiz olar týraly da aıtty.
Birinshiden, eń myqty biriktirýshi faktor – til. Bir tilde sóıleıtin ulttyń bolashaǵy zor. Jastar kóp til bilse jaman emes, biraq bir-birińdi túsiný úshin, qoǵamnyń tynysyn tereń seziný úshin bárimiz memlekettik tildi bilgenimiz jón. Onyń ústine ortaq mentalıtet pen rýhanı qundylyqtardy qalyptastyrý jolynda til basty rólge ıe.
Ekinshiden, óziniń jeri bar el ǵana memleket dep atalady. Jer sheteldikterge satylmaıdy dep aıtty Prezıdentimiz. Biraq osy jerdi durystap paıdalanýymyz kerek. Aýyl sharýashylyǵyn damytyp, tabıǵı resýrstardy qorǵap, tabıǵatymyzdy qurmetteýmiz qajet. Az eńbek resýrstary bar aımaqtarǵa qandastarymyzdy shaqyrý da artyq emes.
Úshinshiden, ortaq tarıhymyz bar. Balalarǵa arnalǵan fılmderdi túsirýdi, kitaptardy jazýdy jáne qazaq halqynyń tarıhı shejiresin basqa tilderge aýdarýdy tolyq qoldaımyn. Myńjyldyqtarmen ólshenetin tarıhymyzdy nasıhattaıyq.
Tórtinshiden, ultaralyq kelisim. Biz 90-jyldardyń basynda áleýmettik jáne ultaralyq qaqtyǵystarǵa jol bermegen halyqpyz. Kópetnostyqty artyqshylyqqa aınaldyra bildik. Bolashaqta da osy maqsat jolynda jumys isteıik.
Besinshiden, ortaq bolashaǵymyz bar ultpyz. Shynymen de shetelderge oqýǵa ketetin jastarymyz bar. Men de solardyń birimin. Biraq oqýdan soń elge qaıtqan azamattarymyz az emes. Shetelde alǵan bilimimiz ben tájirıbemizdi memleket úshin paıdalanýymyz kerek. Sebebi biz Qazaqstanǵa senemiz.
«Qazaq rýǵa bólinbeıdi, rýdan quralady», deıdi. Dál solaı. Biz tilge, dinge, etnosqa bólinbeıtin ult retinde damýymyz kerek. Olaı bolsa eshqandaı da destrýktıvti syrtqy ne ishki kúshter Táýelsizdigimizge keri áser etpeıdi. Osy faktorlarǵa mán bersek, memlekettiligimiz máńgi bolady. Men oǵan kámil senemin.
Maksım SPOTKAI,
Ulttyq qoǵamdyq senim keńesiniń múshesi
