Partııa ókilderi Chapaev aýylyndaǵy «Qyzyljar sút» bazasynda óńirdiń iri aýylsharýashylyq kásiporyndarynyń basshylarymen birge salany damytý máselelerin qarastyrdy. «Búginde azamattarymyzdyń 40%-dan astamy aýylda turady. Elbasy, partııa Lıderi Nursultan Nazarbaevtyń bastamasymen qolǵa alynǵan «Aýyl – el besigi» jobasy aıasynda biz aýyldyń áleýetin barynsha iske asyrýǵa, aýyl turǵyndarynyń ómir súrý sapasyn jaqsartýǵa odan ári jaǵdaı jasaıtyn bolamyz. Taıaýdaǵy 5 jylda Nur Otan jańa ınvestısııalyq jobalar men fermerlik sharýashylyqtar qurý esebinen aýyl sharýashylyǵynda 500 myńdaı adamdy jumyspen qamtamasyz etý mindetin qoıyp otyr. Aýylda kooperasııany yntalandyrý, aýyl sharýashylyǵy ónimderin forvardtyq satyp alýdy keńeıtý, zamanaýı sıfrly tehnologııalardy engizý boıynsha sharalar qabyldanady», dep atap ótti saılaýaldy shtab jetekshisi Baýyrjan Baıbek.
Beskól aýylynda partııa músheleri «Eńbek» memlekettik baǵdarlamasy aıasynda óńirge qonys aýdarǵan otbasylarmen kezdesip, oblystyń aldaǵy damý josparyn talqylady. Atap aıtqanda, óńirde 65 myń jańa jumys ornyn ashý, myń shaqyrymnan astam avtojol salý jáne jóndeý, 142 aýyldyń 115 myń turǵynyn sapaly aýyz sýmen qamtamasyz etý, muqtaj azamattarǵa arnap 2,5 myń páter salyp, jalpy 1,6 mln-nan astam sharshy metr turǵyn úıdi paıdalanýǵa berý josparlanýda.
Nur Otan partııasynyń Respýblıkalyq saılaýaldy shtaby Pavlodar oblysyna da bardy. Partııa belsendileri «Qazaqstan Alıýmınııi» jumysshylarymen kezdesti. Taıaýdaǵy 5 jylda Nur Otan oblysta keminde 45 myń jańa jumys ornyn ashý, 100-den astam aýyldyń 45 myń turǵynyn sapaly aýyz sýmen qamtamasyz etý, 1,6 myń km avtojoldy jóndeý, muqtaj azamattarǵa 9 myń páter usyna otyryp, 2 mln sharshy metr turǵyn úı salý sekildi jobalardy mindet etip qoıyp otyr.
Budan keıin muǵalimdermen kezdesýde saılaýaldy shtab músheleri bilim berý salasyn damytýdyń negizgi baǵyttaryn talqylady. B.Baıbektiń aıtýynsha, Nur Otan partııasy óńirde 83 mektep salý men kúrdeli jóndeýdi qamtamasyz etedi. El boıynsha 800 jańa mektep salynady jáne shaǵyn qalalarda, aýdan ortalyqtary men aýyldarda qoldanystaǵy 5 myń mektep jańǵyrtylady. Ásirese muǵalim kásibiniń bedelin arttyrýǵa basa nazar aýdarylady. Pedagogterdiń jalaqysy 2 ese ósedi.
Partııa ókilderi Novochernoıarka aýylynyń turǵyndarymen kezdesti. Turǵyndardyń aıtýynsha, Chernoıar aýyldyq okrýgindegi túıtkildi máseleniń biri – aýyl ishindegi joldardyń sapasy. Osyny eskere otyryp, Nur Otan partııasy aýdandyq saılaýaldy baǵdarlamaǵa 19 aýyldaǵy, onyń ishinde Novochernoıarkadaǵy joldarǵa jóndeý júrgizýdi engizdi.
«Jalpy, Elbasy, partııa Lıderi Nursultan Nazarbaevtyń bastamasymen qolǵa alynǵan «Aýyl – el besigi» jobasynyń aıasynda óńirde 170 aýyl jańǵyrtylady», dedi B.Baıbek.
