Shandor Kovach Qazaqstandaǵy saılaýdyń joǵary deńgeıde ótip jatqanyn atap ótti.
«Men Qazaqstanda shamamen 5 ret halyqaralyq baqylaýshy boldym. Sondyqtan Qazaqstanda saılaýdyń árqashan joǵary deńgeıde ótetinin, bul joly da solaı ótip jatqanyn atap ótemin», dedi ol.
Onyń aıtýynsha, bıylǵy saılaý erekshe, sebebi ol qıyn ýaqytta – pandemııa kezinde ótýde.
«Biz saılaýdyń durys uıymdastyrylǵanyn baıqadyq. Munda kirý jáne shyǵý oryndary bólek, temperatýrany tekserilip, kireberis dezınfeksııalanýda. Osy turǵydan alǵanda uıymdastyrý joǵary deńgeıde. Pandemııaǵa qaramastan saılaýshylar kóp daýys beredi dep senemin», dedi Shandor Kovach.
Halyqaralyq baqylaýshynyń aıtýynsha, ótkizilip jatqan saılaýda óreskel buzýshylyqtar oryn alǵan joq. Ýchaskelik saılaý komıssııalary ýchaskelerdi uıymdastyrýǵa óte jaýapkershilikpen kelgen.
«Qazir álemdegi barlyq jerde adam quqyqtarynyń buzylýy týraly aqparattar jıi kezdesedi. Alaıda, men Qazaqstanda eshqandaı buzýshylyqtardy baıqamadym», dep atap ótti ol.
О́ziniń sózinde Sh.Kovach QR-daǵy daýys berý men saılaý prosesin jaqsartý jóninde usynymdaryn aıtty.
«Men adamnyń óz erkin bildirýi óte mańyzdy dep oılaımyn. Adamdar neǵurlym kóp daýys berse, nátıje de joǵary bolady. Árıne, bári aqparattyq naýqanǵa baılanysty, halyq daýys berýdiń mańyzdy ekenin bilýi tıis. Árqashan alǵa umtylǵan jón, ol úshin ozyq tehnologııalardy qoldaný kerek», dedi Shandor Kovach.
