Oblystyq Assambleıa jetinshi jyl qatarynan ótkizip kele jatqan «Mıss Etno-Qostanaı» baıqaýynyń 2020 jylǵy jeńimpazy atanǵan Qyzylgıýl Radjabova – osy tabasaran ultynyń ókili. Qyzylgıýl farmasevtıkalyq kompanııada jumys isteıdi.
– Eń aldymen, osy baıqaýdy uıymdastyryp, bizge kópshilik aldynda óz ultymyzdyń salt-dástúri men ulttyq óneri, as-taǵamy, tarıhy men ádet-ǵurpy týraly áńgimelep, kishkentaı bolsa da boıymyzdaǵy óner ushqynyn syn tarazysyna salýǵa múmkindik jasap otyrǵan oblystyq Assambleıaǵa alǵys bildiremin. Osy baıqaý arqyly men óz ultym – tabasarandar týraly elge biraz maǵlumat berdim dep oılaımyn. Maǵan daýys bergen barshaǵa rızashylyǵym sheksiz. Osy sátti paıdalana otyryp, Daǵystanǵa taýdaı sálem joldaımyn! – dedi Qyzylgıýl.
Onlaın túrde ótken baıqaýǵa oblystaǵy árbir etnomádenı birlestiktiń atynan 14 úmitker qatysty. Kórkine aqyly saı boıjetkender ózderi ázirlegen ulttyq taǵam túrleri men qolóner týyndylaryn kópshilik tarazysyna saldy.
Úmitkerlerge daýys berý nátıjesi boıynsha, grýzın qyzy Dıana Balanchıvadze II vıse-mıss atandy. Bastaýysh synyp muǵalimi bolyp jumys isteıtin Dıana ázirlegen hınkalı, hachapýrı sııaqty taýlyqtardyń ulttyq asy áleýmettik jelidegi kópshiliktiń kóńilinen shyqty.
Kópshilik daýsymen áli mektep qabyrǵasynda oqıtyn ázerbaıjan qyzy Elvına Ragımova III vıse-mıss ataǵyna laıyq dep tanyldy.
Qostanaı oblysy
