Qalalyq máslıhattyń quramy tuńǵysh ret úsh partııaly bolyp ózgerdi. Bul joly máslıhattaǵy «Nur Otan» jáne «Aýyl» partııasy ókilderiniń qataryna «Aq jol» partııasynan saılanǵan depýtattar qosyldy.
Birinshi sessııaǵa Qostanaı ákimi Qaırat Ahmetov qatysyp, barlyq depýtattardy qala ıgiligi úshin jumys istep, turǵyndardyń turmysyn jaqsartý maqsatyna jumylýǵa shaqyrdy.
Qalalyq máslıhatqa partııalyq tizim boıynsha «Nur Otannan» 42 kandıdat, «Aýyl» jáne «Adal» partııalarynan 4, al «Aq joldan» 5 úmitker usynylǵan. «Búginde qalalyq máslıhattaǵy 19 depýtattyń 14-i - «Nur Otan» partııasynyń ókilderi.Ekeýi «Aýyldan», al úsh depýtat «Aq jol» partııasynan», - dedi qalalyq saılaý komıssııasynyń ókili.
Máslıhat depýtattarynyń beseýi – áıel adamdar. Sessııa otyrysynda máslıhat hatshysy saılandy. Bul mindetti Baqytbek Sándibekov atqaratyn boldy.
